BALHOG karon sa presinto uno sa Sta. Ana Police Station ang usa ka drayber human nalambigit sa disgrasya diin usa ka 96-anyos nga lola ang naligsan alas 11:50 sa buntag, Lunes, didto sa Kilometro 5, Buhangin, Davao City.
Ang gibalhog mao si Arnel Magallanes Luayon, 36-anyos, taga Visayan Village, Tagum City kinsa maoy nagmaneho sa Prime mover nga truck.
Sumala pa nga sa maong takna, aksidente niyang napunggit ang biktima nga si Leonora Tan ybanez, 96, taga Buhangin ning siyudad hinungdan nga nakahiagom og mga samad ang biktima.
Nag-viral sa social media ang kuha nga video sa mga netizens diin makita ang biktima nga nagping-it sa tumang kasakit sa nahiagoman niyang samad.
Pahimangno sa awtoridad nga kung mahimo, ubanan ang mga edaran labi na kung molakaw kini aron dunay makagiya kanila.
Base sa blotter sa kapulisan ang biktima daling gidala sa balay tambalan apan sa pag-angkon sa apo sa biktima pinaagi sa post niini sa facebook, namatay na kini. (Jeepy P. Compio)