PATAY ang usa ka 19-anyos nga Grade 11 student human nakuryente dihang nitugsaw sa tubig nga anaa kilid sa poste sa traffic light ala 1:30 kagahapon sa kaadlawon, Martes, didto sa Depo sa Barangay Panacan, Davao City.
Ang biktima nailhang si Laurence Allen Barrios Siarot, 19, tinun-an sa Rizal Memorial Colleges (RMC), ug molupyo sa Avocado Street, Phase 2, Doña Mercedez Subdivision sa maong barangay.
Alas 2 sa kaadlawon, dead on arrival sa Southern Philippines Medical Center (SPMC) ang biktima dihang gidala sa niresponde nga Panacan volunteers.
Saysay sa testigo nga si Frederick Lumantad Tolibas, 43-anyos, security guard nga dihang anaa siya sa Depo Panacan, nagsakay og dyip apan sa iyang pagnaug, iyang nakita ang biktima nga mikirig ug natumba sa pag-agi niini sa poste sa traffic light nga dunay napundong tubig tungod sa pagbunok sa ulan.
Nanawag pa si Tolibas og mga tawo nga motabang sa biktima apan bisan usa walay mitabang sanglit nakuryente ang 19-anyos.
Patay nga lawas sa biktima anaa sa Padre Pio Funeral Homes samtang ang kapulisan padayong nagpalawom sa imbestigasyon aron masayran ang tinuod nga hinungdan sa hitabo.