GILUSAD Martes, Oktubre 8, sa West Bound Terminal ang kanhi pipolkonek ug karon mao na ang “Free Wi-Fi For All” diin libre na nga maka-access ang katawhan sa dakbayan sa pagpangulo sa Department of Information and Communications Technology (DICT).
Sa dakbayan sa Cagayan de Oro, duna nay mga pampublikong lugar nga aktibo na ang libreng Wi-Fi sama sa JR Borja General Hospital, atubangan sa city hall, USTP, Camp Alagar ug Camp Evangelista station hospital samtang gitakdang mabutangan na usab ang pipila ka mga pampublikong lugar sama sa Macabalan Port, Provincial Hospital, mga tunghaan sa silingan nga mga munisipalidad ug madugangan ang sa JR Borja General Hospital.
Samtang gibutyag ni Engr. Aurellano Vicerra Jr., focal, free Wi-Fi for all nga bukas na ang Wi-Fi sa West bound terminal alang sa tanan.
“Naka open na siya wala nay traffic, ang atong total bandwidth karon nga ilabay diri sa westbound is around 80mbps,” matud ni Vicerra.
Samtang nibutyag usab si Dir. Frederick Amores, assistant regional director, nga nakita nga daghan gyud ang mga gustong mogamit sa Wifi.
“We are overwhelmed by the numbers nga daghan gyud gusto mogamit so what we will do, we will take a look as to the usage level, maybe recommend more bandwidth nga among ihatag diri para mas daghan ang makagamit,” matud ni Amores.
Giingong kaya kini sa ilang kagamitan ilabi na nga kung pwedi na nga magamit ang national network sa fibr networks apan naghangyo una kini sa pagsabot sa katawhan.
Gidugang pa niini nga pangitaan pa nila og pamaagi ang sistema nga mabahin og insakto ang serbisyo sa WiFi ilabi na nga 24/7 na kini nga magamit.
Giingong mokabat sa mga 250 ka mga gadgets ang pwedi nga mogamit niini apan lage mohinay gyud kung daghan na kaayo ang mogamit rason nga pangitaan pa og paagi nga ang tanan maserbisyohan.
Gidugang pa nga anaa na sa 3000 ka mga live free Wi-Fi sites sa 17 ka mga rehiyon, 77 ka mga probinsiya, 768 ka mga siyudad ug munisipalidad ug 18 ka point of presence niadtong Oktubre 2 ning tuig 2019.
Nasayran nga kini namhimk na nga balaod niadtong tuig 2017 bulan sa Agusto petsa 2 nga mao ang Republic Act. No. 10929 o Free Internet Access in Public Places Act sa tibuok nasud.