NAGGUKDANAY pa usa napatay sa wala mailang mga suspetsado ang bag-ong laya Martes mga alas 2 sa kadlawon sa Zone 1, Natumolan, Tagoloan, Misamis Oriental.
Giila ang biktima nga si Kleafjan S. Pagara alyas JanJan, 35, taga Zone- 1 susamang barangay.
Sa inisyal nga imbestigasyon sa Tagoloan Police Station nasuta nga gitoktok ang biktima sa iyang puloy-anan apan nakamatikod kini ug misuway og dagan hinungdan sa gukdanay apan naapas kini ug gipusil makapila ka higayon.
Ang biktima, sa pagsusi sa Scene of Crimes Operatives, nakaangkon og duha ka samad sa dughan nga maoy gituohang hinungdan nga patay na kining nahidangat sa St. Paul Hospital.
Narekober sab gikan niini ang lima ka pakete sa gituohang shabu ug uban pa nga mga drug paraphernalia.
Basi sa record sa kapolisan, nalambigit si Pagara sa pagpayuhot sa ginadili nga druga. Aduna sab kini pending nga warrant of arrest.
Gi-monitor kini sa kapolisan human nga nakagawas kini sa prisuhan tuig 2018 ug giingong nibalik sa ginadili nga kalihokan.
Ang mga silingan sa namatay miingon nga wala na nila mamatikdan ang suspek tungod kay dili kini kanunay makita sa dapit.
Ang mga suspetsado giingong misakay og motorsiklo human sa insidente.