KASONG homicide gipasaka nga kaso sa kapulisan sa Provincial Prosecutors Office batok sa 72 anyos nga lolo nga nitigbas patay sa iyang manghod tungod sa ilang away labot sa tubig.
Si P/Msgt. Jhonny Marquiño sa Samboan Police nga nahinabi sa Superbalita Cebu niingon nga hapon sa Lunes ilang nasang-at ang kaso sa piskalya batok kang Germogines Rusiana, taga Barangay San Sebastian, lungsod sa Samboan.
Si Germogines maoy niunay sa pagpatay sa iyang manghud nga si Eladio, 70.
Ang biktima ug suspek nahibaw-an nga managsuon sa amahan.
Matod pa ni Marquiño nga nahitabo ang insidente Sabado sa gabii dihang kalit nga nisulong si Eladio sa balay ni Germogines.
Ang ugat sa panaglalis sa duha tungod lang sa hinay nga agas sa ilang tubig sa barangay.
Sa imbestigasyon sa kapulisan, giingong si Eladio may dala nga .38 caliber revolver.
Dihang iya na untang pusilon ang iyang maguwang, naunhan siya sa pagtigbas.
Naigo sa ulo si Eladio sa makadaghan hinungdan sa kamatayon. (BBT)