HUMAN sa kalamposan sa paghawan sa national ug city roads sa Dakbayan sa Mandaue, ang Mandaue City Legal Enforcement Unit (MCLEU) mopalapad sa ilang clearing operation, moapil na sa barangay roads.
Gibutyag ni Edwin Jumao-as, MCLEU head, nga niapod apod na sila og memo ngadto sa tanang 27 ka mga barangay sa Mandaue aron paghawan sa sidewalks ug dalan sa ilang barangay.
Adunay mga tag-iya sa mga nagbabag sa dalan nga niingon nga ang sidewalk nga ilang giokupar pribado nga yuta.
Apan giklaro ni Jumao-as nga mapribado o ma-government-owned nga sidewalk, ila gihapon ning hawanan basta agianan sa publiko kinahanglan nga hawanan ug sundon ang 1.2 ka metros nga sukod sa sidewalk.
Ila kining gihimo sanglit mao kini ang labing daghang obstructions nga nakita niadtong Ooktubre 3, 2019 nga final validation sa Department of the Interior and Local Government (DILG) sigon sa chief of operations sa MCLEU, Ernesto Bongo.
ABC nagsuporta
Misuporta sab si Mandaue City Association of Barangay Councils president Ernie Manatad sa ordinansa nga nagpahawan sa sidewalk pinaagi sa pag-abiso sa mga kapitan sa barangay nga motuman sa ordinansa ug mohatag sa ilang report ngadto sa MCLEU.
“I will also advise all 27 punong barangays to issue an executive order constituting and activating our respective Barangay Clearing Operation Team to carry out the intensified implementation of road clearing and undertake other related tasks at hand with the assistance of the City Legal Enforcement Unit,” ingon ni Manatad.
Dugang sab niya nga kon makabantay siya og mga barangay nga wa motuman sa ordinansa, siya mismo ang motawag sa atensyon sa kapitan.
“I’m sure the DILG director will also monitor our respective progress reports related to the implementation of clearing operation order,” sigon ni Manatad.
Kon di motuman ang mga barangay sa ordinansa, aduna kini silot kay kini maisip nga dereliction of duty. Apan, aduna gihapon kini due process.
Ang mga barangay mosumiter og pagpasabot kon nganong di sila angay silutan o suspensuhon. Mahimo silang makadawat og 60 ka adlaw nga preventive suspension.
Kining clearing operation sa barangay roads usa sab sa giproblemahan sa mga barangay sanglit adunay mga barangay hall nga way parkinganan sama sa Barangay Tabok.
Si Konsehal Emil Rosal sa Barangay Tabok nipaambit nga naglisod sila sa pagpangita og bakante nga lote aron mahimo nilang parkingangan sanglit ang ilang lugar industrialized na.
Ang Barangay Tabok adunay duha ka garbage truck, usa ka ambulansya, usa ka fire truck ug duha ka pick-up nga sakyanan ug uban niini nagpark sa sidewalk.
Mopalit
Pagdawat sa maong barangay sa memo gikan sa MCLEU, nipahigayon dayon sila og session sa tanang konsehal kauban ang ilang kapitan sa miaging semana, Miyerkules.
Sigon ni Rosal nga nakigsabot na sila sa mga tawo nga adunay planong mobaligya sa ilang luna.
Ang Barangay Tabok usa lang sa 13 ka mga barangay nga way tarong nga parkinganan sigon ni ABC President Manatad.
“Ang remedy ana adto sa layo i-parking kanang naay space or private parking lot iparking,” sugyot ni Manatad.
Ang 60 ka adlaw nga mando ni President Rodrigo Duterte sa paghawan sa mga dalan batok sa mga obstruction ngadto sa tanang local government unit sa nasod nahuman niadtong Septiyembre 29,2019.
Sa wa pa ang mando sa Presidente, ang Mandaue mipasar na og ordinansa nga gitawag og “Anti-Use of Sidewalk” maong mas gipahingusgan nila ang pagpanghawan.