UPAT ka mga kasong acts of lasciviousness ug duha ka mga kasong pagpanglugos ang atubangon sa 49 anyos nga electric trike (E-trike) driver human madakpi sa mga barangay tanod sa Bulacao, Dakbayan sa Sugbo.
Nadakpan si Falcundo Caday-Tabura, 49, taga sityo Peace Valley, Barangay Bulacao, human nisumbong sa mga tanod ang uyoan sa usa sa upat ka mga bata nga giingong iyang mga biktima nga gidagit ang iyang pag-umangkon.
Ang uyoan maoy nakasakop kang Tabura nga gipasakay sa e-trike ang iyang pag-umangkon.
Si Tabura, gi-turnover ngadto sa Pardo Police Station, diin siya positibong giila sa mga bata.
Mga biktima nagpangedaron og 7, 8 ug 9 anyos, duha niini mga lalake.
Si P/ Cpl. Krizzia Carol Regudo sa Women and Children Protection Desk (WCPD) sa Pardo Police, kinsa naghawid sa kaso, nipasabot sa Superbalta Cebu nga sa upat ka mga bata, tulo ang ningpasangil nga sila gipanghinol ni Tabura.
Ang usa sa mga biktima mao ray namasangil nga siya gi-rape makausa niadtong Agusto ug makausa sa Septiyembre ning tuiga.
Matod ni Regudo nga mao kini hinungdan nga tulo ka mga kasong acts of lasciviousness ug duha ka mga kasong rape ang ilang ipasaka batok kang Tabura karong adlawa ngadto sa Cebu City Prosecutors Office.
Ang mga bata nagduwa gawas sa ilang balay dihang niagi si Tabura nga nagsakay sa iyang e-trike.
Giingong gipugos pagpasakay ang 7-anyos nga batang babaye hinungdan nga gigukod sa mga kabanay.
“Kagahapon (Martes) gihalokan pa sa suspek ang bata ug iyang gipugos sa pagpasakay sa e-bike. Maayo na lang gali nga nakit-an sa uyoan sa bata ug gisundan hangtud nga nababagan ug na-rescue ang bata,” asoy ni Regudo.
Sa pagsukitsukit sa mga ginikanan sa ilang 7-anyos nga anak nga babaye, didto na kini nitug-an nga siya naabusohan ni Tabura.Ang maguwang nga 9-anyos ilang nasayran nga gi-rape ni Tabura.
Sa imbestigasyon, nitumaw nga laing duha ka mga batang lalake gibiktima ni Tabura pinaagi sa giingong paghinol sa ilang mga kinatawo.
“Koan man na siya murag double blade na siya kay iya man sad hilabtan ang lalake. Ingon aning akong pag-umangkon nga gahapon sa hapon gisakay daw siya anang tawhana sa motor, kanang Racal. Karon giingnan ko sa iyang maguwang. Ana siya nga, Te, gigukod namo ang motor, Te, kay gisakay siya, Te, paghuman wala siya gihunong kay gi rape man ko ana niya sa una,”kutlo sa iyaan sa 9 anyos nga giingong biktima.
Dugang pa ni Regudo nga ang suspek mokuha sa atensyon sa bata pinaagi sa pagpakighigala ug mohatag og kwarta nga tag P20 o tag P50.
Ang 9-anyos wa masayod diin siya gidala kay gitaptapan ang iyang mga mata.
“Matod pa sa bata (9 anyos), Sir, kaduha ka higayon nahitabo nga nahilabtan siya niadtong bulan sa Agusto ug sa milabay nga bulan,” matod ni Regudo.
Nanghimakak
Samtang si Tabura nga gikuhaan sa iyang habig hugtanong mihimakak sa mga pasangil sa mga bata kaniya.
Matod pa ni Tabura nga igo lang niya gipasakay ang mga bata kon molabay sa maong dapit.
Mohatag siyag P10 o P20 sa mga bata para pamainit kon wala silay kwarta kay naluoy siya. Siya nipasangil nga gitudloan sa mga ginikanan ang mga bata aron siya pasanginlan ug maduot.
Hagit ni Tabura nga ipa-medical exam ang mga bata aron mahibaw-an kon tinuod ba ang mga pasangil batok kaniya.
Matod niya limpyo ang iyang konsensya.
Ang mga bata ipahiling sa pink room sa Vicente Sotto Memorial Medical Center.