NAHIMONG maduguon ang pagpaniid sa mga sakop sa Cordova Police Station sa Purok Kumpang, Barangay Bangbang, lungsod sa Cordova, pasado alas 2 sa hapon sa Miyerkules, Oktubre 9, 2019.
Maniid ra unta sila sa mga durugista sud sa usa ka balay, apan ilang nasum-ukan sa kalibunan ang unom ka mga tawo nga nag-pot session, usa niini kanhi pulis nga maoy ilang target.
Giingong ang pulis namusil sa Cordova Police operatives hinungdan sa pinusilay.
Target unta sa case buildup sa kapulisan sa Cordova si Lowel “Boyet” Pacallago, high value target (HVT) sa provincial level sa kapulisan, kinsa dugay nang gipangita tungod sa pag absent without official leave (AWOL) isip pulis.
Matod ni Police Captain Efren Diaz Jr., hepe sa Cordova Police Station, nakadawat sila og taho sa nahimutangan ni Pacallago sa balay sa usa ka Arbeth Arvillon sa Brgy. Bangbang hinungdan nga ilang gisusi.
Apan nakurat na lang sila dihang nag-pot session diay si Pacallago, Arvillon ug mga kauban sa usa ka libunong bahin duol sa balay ni Arvillon nga adunay langob-langob.
Giingong unang gipabuthan sa grupo ni Pacallago ang mga pulis hinungdan nga napugos sila pagbawos nga misangpot sa engkwentro.
Namatay sa engkwentro sila si Arvillon ug Arnel Macan, pulos nagpuyo sa dapit.
Apan nakasibat si Pacallago ug laing usa ka kauban human nidagan suot sa kalibonan ug bakhawan.
Gigukod unta sila sa kapulisan apan gumikan kay di sila sweto sa lugar, nakaabot sila sa sapa padulong sa dagat.
Ilang gituohang nakalangoy sa dagat sila si Pacallago ug usa ka kauban.
“Si Arbeth actually HVT natin yan sa municipal level. Si Boyet dito yang area isa sa mga malaki, isa mga dahilan yang pag Awol niyan ay nasa watchlist siya. Tinitingnan pa natin yung link niya. Hindi siya tumigil, patuloy pa rin siya sa operation,” matod ni Diaz.
Nasikop usab sa kapulisan sila si George Macan, igsuon ni Arnel, ug Gerlin Perocill.
Ang duha pulos niangkong nag pot session sila apan mihimakak nga nakaila sila ni Pacallago ug mga kauban.
Back up
Gumikan sa kasweto ni Pacallago sa lugar, nanawag og backup ang Cordova Police sa mga sakop sa Provincial Intelligence Branch (PIB) ug mga sakop sa Provincial Mobile Force Company (PMFC) sa Cebu Provincial Police Office (CPPO) nga gipangulohan ni Lieutenant Colonel Marlu Conag.
Gihulagway ni Conag si Pacallago nga makamao hinungdan nga nakasibat gamit ang kalibonan ug bakhawan sa dapit.
Giawhag ni Conag ang mga lumolupyo sa kasikbit nga mga lugar sa pagsumbong sa nahimutangan ni Pacallago.
“His pistol is sunod sunod ba, may rhythm ba. You would really know na marunong pumutok. So, ginawa namin nung dumating kami, nagtago sila sa bakhawan sa ilang area, nag-approach pa lang kami tumakas sila sa other side,” asoy ni Conag sa Superbalita Cebu. (dugang taho ni GPL)