MGA pinili nga mga atleta sa Civil Security Unit gikan sa mga distrito sa dakbayan sa Davao magsangka sa dulang basketball ug volleyball sa Davao City Recreation Center (kanhi Almendras Gym) sulod sa siyam sa Sabado.
Gihimo Miyerkules sa buntag ang opening program sa torneyo nga gitambongan ni Public Safety and Security Command Center chief Retired Colonel Angel Sumagaysay, inubanan ni Army Retired Colonel Lyndon Panesa, Sports Development Division-CMO officer-in-charge Michael Aportadera ug Dina Fe Lacorda sa Almendras Gym.
Mga tim nga mangapil sa padula mao ang DC Establishments PSSCC, CSU Toril Blazers, 2nd District Equalizers, TUGCABA Warriors, (Tugbok, Calinan, Baguio), Admin Smashers, CSU Talomo Yellow Team, 2nd District Warriors, Marilog Hills, Talomo Panthers ug Gen Roxas District.
Gibutyag ni Panesa nga ilang gimugna ang paugnat sa kusog alang sa mga sakop sa CSU isip pamaagi nga magkasuod ang mga sakop kay dili lang trabaho ang mabutang sa hunahuna sa ilang ginsakpan apan duna sab silay panahon sa paglulinghayaw.
Sugod sa bulan sa Nobyembre, daghan ang mga aktibidad sa dakbayan sa Davao nga ilang hatagan og pagtagad sama sa kalag-kalag ug sa umaabot nga Pasko Piyesta kon diin ning maong panahona mag-una ang ilang hunahuna sa pagtabang alang sa kahusay ug kahapsay sa dakbayan sa Davao, matud ni Panesa.
Gikalipay sab sa mga CSU ang saad ni SDD-OIC Aportadera nga mohimo siya og programa kon diin iapil ang paugnat sa kusog sa CSU sunod tuig tungod sa ilang gikatampo alang sa kalinaw sa dakbayan.
Tungod sa kapit-os sa panahon, wala makatambong si Bise Mayor Sebastian Baste Duterte nga maoy giimbita nga mohatag unta og mansahe.
Hinuon, iyang gipaabot ang iyang mensahe nga gibasa ni Panesa kon diin iyang gipanghinaut amg kalampusan ug malingaw ang mga sakop sa CSU.