KON si National Youth Commissioner Ryan Enriquea ang matuman, buot niya nga buwagon na ang mga estudyante nga lalaki ug mga babaye kay ang ilang pag-uban sa eskuwelahan mahimong hinungdan nga mabuntis ang babaye kadugayan.
Gikan kuno sa eskuwelahan mangadto ang mga estudyante sa ilang mga balay diin didto ipadayon ang ilang wa nahuman nga buluhaton sa eskuwelahan apan kay init na, lahi na ang buhaton kay sex na ang mahimong sangputanan.
Mamahimong peligruso ang mga bata nga naa sa Grade 7 hangtud Grade 12 ang ilang mga pagbati ug naa sa panahon nga buot sila magduki-duki o mag-explore ug mag-adventure.
Kusog sab ang pagtaas sa ihap sa mga batan-on nga nangabuntis o ang ginaingon nga teenage pregnancy ug ang human immunodeficiency virus (HIV). Ang teenage pregnancy nakadugang sa kusog nga pagsaka sa populasyon sa nasud.
Sumala sa pagtuon, naa sa 200,000 ang mga batan-on nga 15 ngadto 19 ang edad naapil sa ihap sa mga nabuntisan niadtong 2017.
Sa 2018, naa sa 104.9 ka milyon ang populasyon sa atong nasud.
Kon ang pag-uban sa mga estudyante nga lalaki ug babaye sa eskuwelahan nahimong pabilo, tingali usa ra kini sa hinungdan apan ang pagbuwag kanila dili maoy sulbad sa maong suliran.
Nahinumdom ko sa eskuwelahan nga gipadagan sa relihiyuso nga grupo diin dunay boys ug girls department ug pulos lang lalaki ang mag-uban, babaye sab sa pikas nga campus sa eskuwelahan.
Gani man, duna say mga tumutoo nga nagdili sa mga lalaki nga mosagol sa mga babaye panahon sa pagsimba kay aron malayo sa tentasyon. Kinsa man gyud kaha ang nagadala sa tentasyon aron mahimo ang sala, ang abaye ba o ang lalaki?
Dili na lang ba nato iapil pagkuwenta ang inpluwensiya nga nakuha sa mga bata sa mga telebisyon, Youtube ug sa mga gadget diin sa linghod nilang pangedaron ila nang nakita ang mga buhat nga unta angay lang sa mga edaran?
Ang pagpasagad sa mga ginikanan, dili na lang ba sab nato kuwentahon? Dunay akong nahibaw-an nga mga kabataan (babaye) nga napugos pagbaligya sa ilang lawas tungod walay makaon sa ilang balay, wala say klaro nga trabaho ang mga ginikanan.
Nawala na sab ang debosyon sa panimalay diin pagsalop sa adlaw magtapok ang pamilya aron mopasamat sa Ginoo diha sa ilang mga altar, gipadaplin na ang pag-ampo tungod sa mga teleserye nga ginasundan.
Kon ngil-ad ang dagan sa panahon karon, timailhan lang kini nga nia na ta sa katapusan nga bahin sa kalibutan diin ang mga tagna nangatuman, mga ilhanan sa katapusan. Imo man bulagon ang mga estudyante diha sa eskuwelahan, sa kantidad nga P1.00 o usa lang ka text mag-abot lang gihapon sila inig panggawas ug magbuhat sa dili maayo kon wala gisilsil sa mga ginikanan ang ka-importante sa dungog kay kadaghanan sa katawhan karon pulos na immoral.
May bili pa ba ang moralidad diha sa atong mga namunoan sa kagamhanan? Sa mga nagdumala sa mga simbahan? Sa mga eskuwelahan?
Sa atong yano nga pagsabot, ang pagbalik sa pagka-diyosnon mao ray makasulbad, dili ang pagbuwag sa mga estudyante diin ang mag-uban pulos lang mga lalaki o kaha pulos lang mga babaye.