DESIDIDO nga mopasaka og kaso ang pamilya sa ulitawo kinsa giingong adunay problema sa pangisip, human gipatay sa silingan alas 2 sa hapon sa Purok 6, Barangay Lagab, Compostela Valley Province niadtong Lunes, Oktubre 7.
Ang biktima giila nga mao si Jonee Gomez, 32, samtang ang gitumbok nga suspek nailhan sa pangalang Reynan Gonzales, hamtong ang pangedaron, pulos molupyo sa nahisgutang dapit.
Sa gihimong pakighinabi sa igsuon sa biktima nga ginganlan og Vergie, 31, gisaysay niini nga igo lamang nagkabo og tubig ang iyang maguwang dihang giduol ug gisumbag sa suspek kinsa sumala pa nasuko kay gitabisan og tan-aw sa biktima samtang atua sa basakan.
“Nagkabo ra man to og tubig sa flowing ang akong maguwang nga samtang naghulat nga mapuno og tubig ang balde, giduol ni Reynan ug gisumbag kay nasuko nga gitan-aw sa akong maguwang,” butyag ni Vergie.
Matud pa nga mipauli ang biktima sa balay ug gihatud ang kinabo nga tubig, unya nibalik na sab aron sa pagkuha og dugang tubig.
Apan gisugat siya sa suspek nga nagbitbit og armas ug gipusil.
Tulo ka mga samad pinusilan ang naangkon sa biktima kon diin ang usa gipunting ang iyang mata samtang naigo sab ang iyang dughan hinungdan nga nahagba sa yuta ug namatay.
Sumala pa nga nagpakiluoy pa unta ang biktima ngadto sa suspek pinaagi sa pag-ingon nga “Tama na, sakit na biya kaayo”. Apan wa mamati ang suspek sa pagpangiyupo sa biktima.
Dugang saysay ni Vergie nga human pusila sa suspek ang iyang igsuon, niadto ang suspek sa balay sa biktima ug masuk-anong miingon, “Kinsa’y isog diri?”
Ang suspek nadakpan sa mga niresponding pulis alas 6 sa gabii sa samang adlaw ug gipriso sa Compostela Municipal Police Station.