DIDTO sa Davao City adunay bag-ong pamaagi aron madisiplina ang mga tawo labi pa ang mga batan-on nga maglaroylaroy panahon sa kagabhion. Adunay grupo sa mga tawo nga magsakay gihapon og mga motorsiklo o mga riding-in-tandem nga mokalit lang og tumaw sa grupo sa mga tawo nga mag-estambay labi pa kon mag-inum-inum og mamunal sa mga tawo gamit ang batuta o ikog sa pagi. Puwerteng sakita ana uy.
Ang maong mga riding-in-tandem nga mamunal maoy mipuli sa mga riding-in-tandem nga mamusil kaniadto o extra judicial killings. Daghan ang nagduda nga ang maong mga tawo sakop gihapon sa kapulisan. Apan ang mga opisyal sa kapulisan nanghimakak niini. Gani, mipakatap ang kapulisan og mga uniformed policemen panahon sa kagabhion aron pagsumpo aning “bunal squad.” Apan hangtod karon wala gihapoy nadakpan.
Sama sa pagpamatay sa mga badlungon sa katilingban, gi-welcome usab kini sa pipila ka mga lumolupyo kay naka-disiplina kini sa mga laagan. Daghang mga ginikanan ang nalipay kay dili na molaag ang ilang mga anak labi na ang mga minor de edad panahon sa kagabhion. Labi pang nalipay ang mga asawa kay dili na molaag ang ilang mga bana.
Pero nang-reklamo ang mga call center agents kay mabiktima man sila. Nahibalo naman kita sa working schedue sa taga call center nga irregular man ang ilang mga schedules sa trabaho. Mo-report ug mo-uli sa dis-oras sama sa tungang gabii o kadlawon. Apilon man sila og latus sa Bunal Squad. Di pod maayo kay wala man na sila maglaroy-laroy.
Ang kagamhanan sa Davao City labi pa niadtong panahon ni kanhi mayor ug karon Presidente Duterte estrikto nga mipatuman sa curfew hours ingon man ang pagdili sa pagbaligya og ilimnun nga makahubog panahon sa kagabhion. Gikan sa ala una hangtod sa kaadlawon wala nay tugotan nga tindahan o bar nga mo-abre ug mamaligya og ilimnun nga makahubog. Ang anti-smoking ordinance estrikto usab nga gipatuman. Mas maayo kaha nga ipatuman ang “bunal squad” dinhi sa ato? (bobbygnalzaro@gmail.com)