SUWAYAN pagbuhi sa Cebu Sharks-Casino Ethyl Alcohol ang ilang gamayng paglaom alang sa playoffs sa dihang ilang ikasangka ang Bacoor Strikers sa Maharlika Pilipinas Basketball League (MPBL) Lakan Season sa Strike Gymnasium karong gabii.
Bitbit ang 6-9 nga baraha, ang Sharks nga nagkumbitay sa ikasiyam nga dapit sa South division, nakakita og gamay kahayag alang sa sunod round sa dihang ilang gilubong ang Soccsksargen Marlins, 89-57, sa niaging semana ubos sa pagpangulo sa ilang bigman nga si William McAloney kinsa mipakatap og 27 puntos ug 17 ka rebounds.
Sa interview sa Sun.Star Cebu, si McAloney, lumad nga taga dakbayan sa Naga, Cebu, mibutyag sa subsob ang ilang preparasyon batok sa Bacoor, kinsa lab-as pa sa ilang ikaunom nga sunodsunod nga kadaugan.
Ang pagpakgang sa kainit sa star sa Strikers nga si Gab Banal maoy gitun-an karon og maayo sa Sharks.
Apan dugang ni McAloney nga dili lang si Banal ang ilang gipangandamhan kon dili lakip na usab niini ang ubang pambato sa Bacoor.
Gitumbok ni McAloney nga ang ilang kadaugan magdepende kini sa ilang pag-execute sa depensa. (JBM, JNP)