ANG pagkablit sa ilang paglaom alang sa Final Four maoy tahas nga sagubangon sa University of San Carlos (USC) Warriors ug sa University of Southern Philippines Foundation (USPF) Panthers sa dihang mag-abot ang duha karong gabii sa Cebi Schools Athletic Foundation, Inc. (Cesafi) men’s basketball sa Cebu Coliseum.
Sa kasamtangan, ang Warriors nga napildi sa Southwestern University-Phinma Cobras, 66-61, sa niaging Dominggo, adunay 4-3 nga baraha alang sa ikatulong puwesto.
Samtang ang Panthers, sa ilang bahin, nag-atubang sa malisod nga sitwasyon nga may 3-5 nga record human masugamak og duha ka sunodsunod nga kapildihan lakip na niini ang 80-90 nilang ikaduhang pagkapukan sa defending champion University of the Visayas (UV) Green Lancers niadtong Martes.
Samtang sa high school division, panagsangka sa mga naghingutas nga teams maoy modayandayan sa double-header karong adlawa.
Ang Cebu Institute of Technology-University (CIT-U) Wildkittens, ang team nga gisagunsunan og lima ka pildi human moabli og kadaugan sa opening day, mosakbang sa wa pay daog ug newcomer University of Cebu Lapu-lapu/Mandaue (UCLM) campus.
Ang UCLM nagpas-an og 0-4 nga baraha. (JBM)