TALIWALA ning kontrobersiya nga mitumaw karon tali sa National Basketball Association (NBA) ug sa China, tinguha karon ni NBA commissioner Adam Silver nga makigtagbo ni Yao Ming aron mahapsay kining maong kagubot.
Ang panagbangi mitumaw sa dihang ang manager sa Houston Rockets nga si Daryl Morey, sa iyang tweet sa social media, mipadayag sa iyang suporta ngadto sa nagprotesta sa Hong Kong kinsa nagdemanda sa ilang hingpit nga kagawasan o demokrasya.
Tungod niini, nasagmuyo ug gibati og grabing kalagot ang Chinese government sa maong tweet hinungdan nga nanawagan kini sa NBA nga kapahamtangan og bug-at nga silot si Morey.
Gawas niini, gusto usab sa Chinese government nga mangayo og pasaylo ang NBA ngadto sa China ug sa samang higayon mihulga kini nga putlon na ang pagpasalida sa mga NBA games sa ilang nasod ug tangtangon usab ang mga Chinese sponsorships sa team.
Sa laktod nga pagkasulti, nahudlat karon ang relasyon tali sa NBA ug sa China nga migamot na sulod sa 40 ka tuig.
Apan bisan pa niini, si Silver way plano nga mangayo og pasaylo ang NBA. Tungod kay alang kaniya ang gihimo ni Morey maoy kabahin sa freedom of expression nga ilang gitamod isip katungod sa usa ka tawo.
Hinuon, ang gi-tweet ni Morey nga na-post niadtong Biyernes, dali kining gi-delete na sa social media.
“I’m hoping together that Yao Ming and I can find accommodation,” matod ni Silver kagahapon. But he is extremely hot at the moment, and I understand it.”
Ang pamahayag ni Silver iyang gipadungog atol sa new conference sa Tokyo sa wala pa ang exhibition game sa Rockets ug sa Toronto Raptors.
Iyang gidepensaan ang katungod ni Morey sa pagpadayag sa iyang sempatiya ngadto sa nagprotesta.
Ang mainitong protesta nagsugod niadtong bulan sa Hunyo, apan hangtod karong wala pay timailhan nga mahilot ang kasungian.
“I understand there are consequences,” matod ni Silver. “We are not apologizing for Daryl exercising his freedom of expression. I regret that so many people (in China) are upset, including millions and millions of our fans.”
Ingon ni Silver nga ang iyang buhatan nakig-estorya na ni Yao ug gikatakdan nga makig-meeting karong adlawa sa dihang mobisita siya sa Shanghai diin ang Los Angeles Lakers ug ang Brooklyn Nets mopahigayon og duha ka exhibition games sugod ugma ug sa Sabado didto sa ShenZhen. (JBM)