DALAYGON ang mando ni Presidente Rodrigo Duterte bahin sa paglimpiyo sa babag sa tanang kadalanan, lakip sa sidewalks, nga higpit nga gipatuman sa Department of Interior and Local Government (DILG).
Nitapos na ang tagal sa DILG nga 60 ka adlaw. Ug karon, ang ahensiya nihimo og pagpang-inspeksiyon kon mituman ba ang local government units (LGU) sa mando. Hinuon, dinhi sa Sugbo pulos naningkamot nga makatuman sa pagpanglimpiyo sa paghan-ay sa kadalanan.
Apan ang dakong hagit sa matag LGU mao ang pagmintinar o sustener sa nasugdan na nga kanindot ug kahan-ay sa sidewalks labi na sa dakbayan sa Sugbo. Masustener ba kaha kini? Nasayod kita nga ang ubang mamaligyaay, ang awtoridad lang usab ang gibantayan.
Namatikdan nato nga ang kampanya sa paglimpiyo sa dan ug sidewalk nakatutok sa sentro nga dapit. Wa moabot sa kasuoksuokan sa dakbayan diin mas importante tungod sa ilang dili lapad nga dalan apan puno sa sakyanan nga nag-park sa daplin. Dakong kalbaryo sa mga kabomberohan kon dunay sunog sa dapit.
Maayo ang ehemplo nga gipakita sa Mandaue City Legal Enforcement Unit (MCLEU) nga mopalapad sa ilang clearing operation ngadto sa sa barangay roads. Gibutyag ni Edwin Jumao-as, MCLEU head, nga niapud-apod na sila og memo ngadto sa tanang 27 ka mga barangay aron paghawan sa sidewalks.
Dunay mga tag-iya sa mga nagbabag sa dalan nga niingon nga ang sidewalk nga ilang giokupar pribado. Giklaro ni Jumao-as nga pribado o government-owned sidewalk, parehong hawanan basta agianan sa publiko.
Misuporta sab si Mandaue City Association of Barangay Councils president Ernie Manatad sa ordinansa nga nagpahawan sa sidewalk pinaagi sa pag-abiso sa mga kapitan sa barangay.
Maayo kining paning-ingnan sa ubang LGUs.