NAMATAY diha-diha ang usa ka 29-anyos nga nag sideline pagka habal-habal driver human pusila sa wa mailhing mamumuno sa Brgy. Mactan, Dakbayan sa Lapu-Lapu, pasado alas 11 sa Martes sa gabii, Oktubre 8.
Ang biktima giilang si Admer Seroy, taga Brgy. Punta Engaño, Dakbayan sa Lapu-Lapu.
Si Seroy giingong gikan sa habig sa Punta Engaño ug padulong sa Maribago luwan sa iyang motorsiklo dihang kalit nga gipusil tumong sa ulo sa wa mailhing mamumuno.
Way nakakita, sumala pa, kon pila ang gunman nga namusil.
Di usab ma-establisar sa kapulisan aduna bay pasahero si Seroy atol sa pagpusil.
Matod ni Police Staff Sergeant Marlou Bretania, imbestigador sa Police Station 2 sa Lapu-Lapu City Poliice Office (LCPO) nga posibleng gisundan si Seroy sa mga mamumuno hangtod nga nakalugar pagpusil kaniya.
Wa pay matumbok nga motibo ang kapulisan sa pagpatay kang Seroy sanglit way record sa ilang area of responsibility (AOR).
Wa pa usay saksi nga nakig-alayon sa kapulisan mahitungod sa nahitabong pagpamusil.
Sa inisyal nga pakisusi sa background sa biktima, giingong gawas sa pag sideline ug habal-habal, aduna kini gihikay nga pwesto sa merkado sa Saac, Brgy Buaya.
Kanhi usab kini drayber sa PUJ ug V-Hire.
“Wala pa kaayo tay ma-establsih pero posible personal. Magpa schedule pa ta og view sa CCTV kon nakuhaan ba,” matod ni Bretania.
Usa ka kabhang ug usa ka bala sa gituohang kalibre .45 nga armas de fuego ang nakuha sa kapulisan gikan sa crime scene.
Nagtuo ang kapulisan nga posibleng nipalyar ang unang pabuto sa gunman.