Edukasyon, turismo sentro sa 100 ka adlaw ni Samsam
MGA nahimo sa Talisaynon ug dili sa mayor sa Talisay City lang, sama sa natad edukasyon, disaster preparedneess, kamahinungdanon sa agrikultura, kalikupan nga naglangkob na ang baha ug Aksyon Agad nga mga programa.
Pipila lang kini sa mga gipasigarbo ni Talisay City Mayor Gerald Anthony Gullas, Jr. nga gisugdan na sa paghimo o nahimo na sa kagamhanan su’d lang sa 100 ka adlaw sa iyang administrasyon.
Kini gipadayag atol sa iyang paghatag sa dul-an duha ka oras nga State of the City’s Address (Soca), sa Talisay City Complex, alas 3:30 sa hapon, Miyerkules, Oktubre 8.
Nitambong sa Soca si Gob. Gwendolyn Garcia, 1st district provincial Board Member, Yolanda Daan, kanhi Talisay mayor ug karon kongresista, Eduardo Gullas.
Anaa usab ang mga nangulo sa silingang’ mga lungsod sa Minglanilla ug San Fernando, ang tibuok konseho sa Syudad sa Talisay, mga department heads, barangay officials, pipila s amga tinun-an ug kabanay sa mayor.
Ang kalabot sa libre nga edukasyon sa Talisay City College ug ang Cream of the Crop Scholarship Program ang usa sa nakapahugyaw sa mga tinun-an nga nisaksi sa Soca.
Iyang gihimug-atan usab ang kalabot sa turismo sa dakbayan, nga kinahanglan anaa gyud ang brand sa Siyudad.
Nag-una niini ang pagpaila sa ‘the best lechon’ sa tibuok kalibutan.
Ang himuon nga tourism destination alang sa pamilya, apil na usab ang agro ug eco tourism sa kabukiran ug sa kadagatan.
Atol sa Soca, iyang gipahibaw nga sa sunod tuig, matag usa sa 22 ka barangay ang mahatagan og tag-P1 milyones alang sa bisan unsa nga priority project sa matag barangay.
Sa 2020 budget sa Siyudad, giapil na sa linya niini ang mga proyekto nga gikinahanglan sa matag barangay. Kay alang sa mayor nga mas nakahibalo ang mga barangay opisyal sa problema sa kada barangay.
Kini alang na sa dugang kalambuan, kalabot sa inprastraktura.
Iyang gitumbok ang ka-importante sa pagpanglimpyo, hinungdan nga anaa ang kada semana nga pagpanglimpyo sa estero, kada bulan nga clean-up sa kasapaan ug quarterly sa coastal areas aron dili na mahitabo pa ang kanhi mga nasinati nga baha.
Ang programa nga ‘Basura mo, panginabuhian ko’ ug ang labing limpyo nga sitio, barangay, elementary ug high school nga mga tunghaan tipik niini.
Anaa usab ang pagtabang sa mga Talisaynon nga nisalmot sa bisan unsa nga tigi sa paugnat sa kusog ngadto sa laing lugar sa nasud, ug gani ang uban nakig-compete na internationally.
Usa ka sports summit ang gipanlantawan nga himuon sa Siyudad.
Samtang daku ang pasalamat sa batan-ong mayor sa Talisay City Police Station nga gipanguluhan ni Police Major Orlando Carag nga dili lang pagpatunhay sa seguridad ug kalinaw ug paggukod sa nalambigit sa ilegal nga druga, gilakip na ang pagpahingusog alang sa aftercare nga programa sa war on drugs, aron mas daghan pa sa mga kanhi nalambigit sa drugas ang matambalan ug hingpit na mobiya sa bisyo.
Kini tinabangan sa Talisay city health office nga programa. Gikatapusan man apan alang sa mayor labing importante, ang Aksyon Agad services, sama diha sa pagpalambo sa City of Talisay Traffic Operations Development Authority (CT-TODA), labot sa pagtubag sa trapiko.
Ang paglimpyo sa kadalanan ug sidewalk, ug ang pagpahiluna sa Tabunok market.
Ang aksyon agad (AA) services, naglangkob na niini ang AA desk diha sa Talisay City District Hospital alang sa libre nga pagpatambal sa kabus nga Talisaynon 24 oras.
Anaa usab ang libre nga palubong.
Sa Aksyon agad, anaa ang nga paglihuk dayon sa mga problema nga gipadangat sa Talisaynon, gikan sa pagbara sa kanal, nadaot nga mga suga sa kadalanan, hangtud sa dagku nga mga problema ug uban pa, gitrabaho usab sa Aksyon agad team, 24/7.
“I’m not going to lie, at times it is very difficult, but one thing is for sure, what I reported for my 100 days can never be done by one man alone, report kini sa Talisaynon, sa nahimo alang sa Talisay,” tipik sa pulong ni Mayor Gullas sa panapos sa Soca. (FMD)