PAGPADUOL sa kagamhanan sa dakbayan sa Lapu-Lapu ngadto sa mga konstituente pinaagi sa pagtunol sa libre nga serbisyo maoy usa sa highlight sa pakigpulong ni Mayor Junard 'Ahong' Chan karong adlawa, Oktubre 10.
Ipadangat ni Chan ang report ngadto sa Oponganon ang iyang First 100 Days isip mayor sa dakbayan nga ipahigayon sa Hoopsdome, Barangay Gun-ob, Lapu-Lapu City karong 1:00 sa hapon.
Lakip nga hisgutan sa opisyal ang social services, peace and order, health, education, tourism, transportation ug uban pa.
Nagkanayon ang mayor nga usa accomplishments nga napahimuslan sa pipila ka mga konstituente sa Lapu-Lapu mao ang pagtunol og “Libreng Serbisyo Para Sa Tanan” usa ka outreach program nga maoy iyang gisaad sa matag Oponganon atol pa sa iyang pagpangampaniya sa milabayng piniliay.
Kasamtangan aduna nay siyam ka barangay sa mainland lakip na ngadto sa isla sa Olango ang nakakuha sa maong programa nga naglakip sa medical consultation ug tambal, legal consultation, dental extraction, pagbakuna sa kahayopan, libreng haircut, massage, livelihood training ug uban pa.
Gibana-bana nga molanat sa 40 minutos ngadto sa usa ka oras ang pakigpulong ni Chan.
Dinapit
Ang mga dinapit naglangkob sa tibuok konseho sa dakbayan ilabi na nga usa ka special session ang mahitabo sa maong kalihokan, department heads, business sectors, academe, barangay officials, transport sector, urban poor ingon man si Kongresista Paz Radaza.
“Gi-receive na sa iyang (Radaza) staff ang invitation,” tug-an ni Chan.
Masaligon si Chan nga mapuno ang 6,000 nga seating capacity sa Hoopsdome diin ang kalihokan sugdan sa 1:00 karong hapon. (FVQ)