GILUSAD na ang ika lima ka tuig sa pagpili sa Most Child-Friendly Police Station sa dakbayan sa Cagayan de Oro.
Anaa sa 60 porsinto ang Police station on site evaluation o kung duna ba silay mga proyekto o programa sa ilang mga Barangay o eskwelahan diin anaa ang mga bata, 20 porsinto school base validation ug 20 prosinto sa community base evaluation.
Lakip niini ang mga hugot nga kampanya sa kapulisan aron maprotektahan ang mga kabataan ug paghatag og mga edukasiyon ug programa ingon pagdala sa mga kaso ug mga pasilidad alang sa mga bata nga nabiktima sa mga pagpangabuso.
Gibutyag ni Al Rashide “Ash” Galaura, child protection officer, nga kini nga programa dakong tabang ilabi na diha sa pagproteher sa mga kabataan o kababayen-an nga giabuso.
“Karon with the help sa atong program nga ginabuhat kauban sila kaning search for child friendly police station naa nay mga advocacy nga mga program naay education-information campaign sa community, sa school,” matud ni Galaura.
Samtang ang Police Station 3 (PS3) sa Agora maoy hall of famer tungod na usab sa mga nag-unang programa sa ilang estasiyon ug maayong pagdala ug paghawid sa mga kaso kalabot na sa mga biktimang mga bata ug mga kababayen-an sa imbestigador sa Women and Children Protection Desk (WCPD) nga si PMSg Cherry Reyes.
“Karon wala pay advice kung apil ba gyud ko sa maong contest, pero kinahanglan siya i-maintain partnership, ang opisina, ang services nga ihatag nato sa atong mga kliyente,” matud ni Reyes.
Ang mamahimong most child-friendly police station makadawat og P120,000; 2nd most child-friendly police station makadawat og P80,000 ug ang 3rd most child-friendly police station makadawat og P60,000.
Samtang P30,000 usab ang madawatang premyo sa Best Child Welfare Project ug P10,000 sa Child Panel list choice award samtang lima usab ang dunay madawatang special award.
Kini gigahinan og pundo sa lokal nga kagamhanan sa siyudad sa Cagayan de Oro pinaagi na usab sa buhatan sa Oro youth development office. Nasayran nga hugot usab ang kampanya sa siyudad nga mas palig-unon pa ug mapadayon ang pagka child friendly city.