TUNGOD sa kadanlog sa dalan, naaksidente ang gimaneho nga motorsiklo sa usa ka sundalo ug gikamatay niini niadtong Oktubre 8 mga alas 5 sa hapon sa Gimilina Street, Barangay Carmen, dakbayan sa Cagayan de Oro.
Patay si Sgt. Jonell Montederamos, miyembro sa Philippine Army nga nadestino sa 4th Infantry Division Camp Evangelista, Barangay Patag samtang ang asawa nga si Rosalyn Montederamos ang samaran usab kinsa angkas niini atol sa panghitabo.
Sa nahipos nga impormasiyon sa kapulisan sa Police Station 4 (PS4) sa Carmen nga samtang gimaneho ni Montederamos ang motorstar 125 nga paingon sa habagatang bahin nawad-an kini og kontrol tungod sa kadanlog sa dalan.
Maayong pagkatumba sa motorsiklong gimaneho niini ug nahapak ang ulo sa biktima sa sementadong bahin sa dalan rason sa hinanaling kamatayon.
Gidala pa kini sa pribadong balay tambalanan apan walay swerteng nakabsan sa kinabuhi si Jonell.
Pabilin pa nga nagpaalim sa pribadong balay tambalanan ang asawa sa biktima samtang ang patay nga lawas sa maong sundalo ang gi-atiman na sa nahabiling pamilya.