GIKALIPAY sa transport group ang clearing operation sa nagkadaiyang dapit ning dakbayan sa Cagayan de Oro ug sa Misamis Oriental.
Gibutyag ni Joel Gabatan, coordinator sa National Confederation of Transport Union (NCTU) regional chapter, nga gikalipay sa ilang hugpong ang maong pagpatuman niini tungod kay dako kining tabang alang kanila nga mga anaa sa sektor sa transportasiyon.
“Ang nakapabor diha ang mga sumasakay ug ang mga dyip sab medyo arang arang na ilang pagpadagan kay di naman traffic mao na nakauyon man mi ana nga balaod hinaot nga magpadayon kana nga boluhaton,” matud ni Gabatan.
Gidugang pa niini nga dako kaayo nga kawad-on alang kanila ang pagkabalda diha sa trapiko tungod kay susama kaniadto nga imbes anaa sa onse ka biyahean anaa nalang sa pito sa dihang daghan na ang mga gapamaligya sa kadalanan.
Nasayran nga gipatuman ang nationwide clearing operation human nagpakanaog og mando si Presidente Rodrigo Duterte kalabot na sa pagkuha pagbalik sa mga kadalanan nga giokupar na sa mga indibidwal human gipangtukoran og mga gambalay.