PABILIN nga hugot ang baruganan sa Kapitolyo Probinsyal nga sila lamang maoy makahibalo ug adunay katungod nga magpahigayon og clearing operation sa palibot sa Kapitolyo.
Kini ang tubag ni Carlo Dugaduga kinsa information officer sa Kapitolyo probinsyal human namahayag si Cagayan de Oro City Mayor Oscar Moreno nga wala nasayod sa balaod si Governor Bambi Emano.
Matud ni Dugaduga nga sa pagkakaron pabiling protektahan ni Emano ang palibot tungod ka na sayod kini nga walay kalapasan.
Dugang sab niini nga ang Kapitolyo probinsyal maoy nasayod unsay buhaton sa palibot ug dili kinahanglan nga magapil-apil ang clearing operation team sa siyudad.
“Hurisdiksyon ni sa Province ug ang provincial government lang ang nakabalo unsay lakang nga himoun kon aduna man nakababag diring dapita. Dili na kinahanglan nga mosulod pana sila,” matud ni Dugaduga ug miingon nga pamolitika ang gihimo sa siyudad.
“Gitubag lang namo sila sa ilang bahad nga sudlon ang kapitolyo. Kinsa may naguna-una ani nga isyu nga sila raman, gitubag lang namo sila,” matud ni Dugaduga.
Unang namahayag si Antonio Resma ang spokesman sa city clearing operation team nga unta mohimo og lakang ang kapitolyo sa paguba sa mga nakababag diha sa mga dalan sa kapitolyo tungod kay kung dili kini mahimo sila na ang mosulod ug maoy moguba niini.