GITUBAG sa Kapitolyo Probinsyal ang isyu nga wala’y building permit ang katukoran sa buhatan sa Tourism nga nahimutang sa Provincial Capitol Ground, Velez Street, dakbayan sa Cagayan de Oro.
Matud ni Misamis Oriental Governor Bambi Emano atol sa iyang programa sa sibyaan sa radyo nga siya mismo magkuha og building permit.
Kini kung tubagon sa dakbayan sa Cagayan de Oro ang gipangita nga building permit pagtukod sa press freedom monument.
Matud ni Emano nga sa panahon nga mayor sa dakbayan sa Cagayan de Oro iyang amahan nga si Dongkoy Emano nagtukod ang administrasyon ni Moreno og press freedom monument nga milyon ug gasto apan wala kini nangayo og permit sa siyudad niadtong tungora.
“Kung ila kanang matubag ako mismo moadto sa City Hall mokuha ko og building permit,” matud ni Emano.
Si City Administrator Teddy Sabugaa namahayag niini human sa pagdili sa Kapitolyo nga mosulod ang clearing operation team sa palibot sa kapitolyo probinsyal.
“Gipadalhan ug notice of violation from OBO (Office of the Building Official) ang Capitol for building the pasalubong center kay wala maglukat sa building permit. Hangtod karon wala nagbali-bali ang Capitol,” matud ni Sabugaa.
Kini nga pamahayag ni Sabugaa gitubag ni Emano.
“If it is really arrogance of power, what have you done during the term your power?” Matud ni Emano kinsa mikwestyon ug mipangita sa building permit sa mga natukod nga building sa kanhi administrasyon ni kanhi governor karon Mayor Oscar Moreno.
Dugang ni Emano nga kung kini ang kagustuhan sa siyudad ila kining i-comply ug kung adunay penalty ilang bayaran.
Sa iyang bahin sab ni Carlo Duga-duga, kinsa information officer sa Kapitolyo probinsyal, niingon nga tumong lamang ni Sabugaa ang pagpakaulaw sa Kapitolyo.
“Giuna gyod dayon niya sa media? Ang ilaha pakaulawan ang kapitolyo,” matud ni Duga-duga sa interbyu sa SunStar Superbalita.
Niaging bulan gipangunahan ni Emano ang pag-blessing ug pagbukas sa buhatan sa Tourism ug sugdan dayon sa Pasalubong Center nga mobalor sa P10 milyon nga proyekto.
Ang OBO niingon nga sa walay building permit niini nakasupak kini sa section 301 sa National Building Code kon asa dili mahimong magtukod kon dili maka-comply sa rekisitos niini.