SUPERBALITA CAGAYAN DE ORO

Trabahante sa mall gitipi

CAGAYAN DE ORO. Giimbestigahan sa Scene of the Crime Operatives ang dapit diin gipusil patay si John Mark Lagumbay, 22, trabahante sa mall, ug residente sa Adela, Camaman-an ning siyudad. Ang pagpamusil nahitabo sa Tangkongan, Pinikitan, Brgy Camaman-an, siyudad sa Cagayan de Oro niadtong Oktubre 8, 2019. (Kris C. Sialana)

GIGUYOD ug gidala sa usa ka dapit ug gipusil-pusil ang usa ka lalaki mga alas 4 sa hapon niadtong Miyerkules, Oktubre 8, sa Tangkongan, Pinikitan, Barangay Camaman-an, dakbayan sa Cagayan de Oro.

Patay si John Mark Lagumbay, 22, trabahante sa mall, dunay kaipon ug residente sa Adela, Camaman-an.

Duha ka mga samad pinusilan ang naangkon ni Lagumbay diin isa niini sa iyang hita ug sa tiyan nga gituohang hinungdan sa kamatayon human posibleng naigo ang atay.

Gibutyag ni Police Lieutenant Tawide Galleon, officer-in-charge sa Police Station 2 (PS2) sa Cogon, nga padayon pa ang ilang imbestigasiyon sa maong krimen ug gikabutyag nga duna na silay “person of interest” nga gitumbok.

Usa sa mga anggulo nga gitutokan sa kapulisan ang kalambigitan sa ilegal nga druga human gikabutyag nga usa ka drug personality ang suspek.

“Mao nay usa sa among gitutokan kay kaning suspek drug personality sa maong lugar sumala sa among pagkuti-kuti nga pag-imbestigar,” matud ni Galleon.

Samtang gibutyag sa inahan sa biktima nga gikan kini sa computer shop ug dunay nakalalis kinsa nikuha og armas ug giti-onan ang biktima rason nga nidagan ug nakapaingon sa maong dapit.

Giingong nangayo pa kini og tabang apan walay niduol ug nitabang niini.

Sa imbestigasiyon usab sa Scene of the Crime Operatives-Northern Mindanao sa pagpangulo ni Dr. Christian Caballes nga posibleng kalibre .45 ang gigamit sa pagpusil sa biktima.

“Posible po base sa sugat caliber 45 ho pero kailangang ma autopsy siya para makuha ang bala sa katawan, ipa-autopsy kasi may bala pa siya sa katawan para makuha natin tas ma-ikompara sa krimen na nangyari dito sa Cagayan de Oro o sa Region 10,” matud ni Caballes.

Gidugang pa niini nga posibleng nakadagan pa ang biktima ilabi na nga wala na kini tsinelas.

“Wala naman po tayong nakita na indikasiyon na malapitan kahit po basiyo ng bala wala tayong nakuha sa crime scene hindi natin alam kung doon siya talaga binaril or baka nakatakbo pa siya kasi wala siyang suot na tsinelas,” matud ni Caballes.

Sutaon pa usab sa kapulisan ang posibleng kuha sa closed-circuit television (CCTV) camera aron masuta ang tinuod nga panghitabo ilabi na ang giingong giguyod sa maong dapit si Lagumbay sa wala pa hinganling suspek.

Aminado usab ang kapulisan nga nasubo kini tungod kay tik-om ang baba sa mga residente sa maong dapit ug bisan ang silingan sa maong panimalay diin nahitabo ang krimen walay mahatag nga ngalan sa tag-iya tungod kay wala sila nakaila.

Gihimakak usab sa kapulisan sa PS2 sa Cogon ang giingong “asset” ang biktima sa kapulisan.

Ang patay nga lawas ang gi-atiman na sa nahabiling pamilya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph