INGON sa dili na gyud mahanaw sa iyang panumdoman ug handurawan ang panagway sa babaye nga nanindag mani diha sa eskina sa aseras. Guwapa ang maong babaye. Usa ka higayon iyang gipahunong ang iyang kotse ug mituyo gyud siyag duol sa nahimutangan sa dalaga. Alang kaniya karon pa siya makakita og katahom nga alang gayud sa iyang mga mata. May daghan nang mga babaye nga iyang mga amiga ug higala, kay puyra panghambog, ambungan siya ug anak sa adunahang ginikanan dinhi sa siyudad. Ug alang kaniya ang panagway sa mga dalaga niyang higala wala makadani sa iyang panan-aw.
Apan kining dalaga nga nanindag mani daw usa ka bag-ong buswak nga Buwan sa iyang panan-aw.
“Ako si Emund. Ikaw, unsay imong ngalan?” ni Edmund dihang miduol siya sa dalaga. Mikuot siya sa iyang pitaka aron pakyawon pagpalit ang gibaligyang mani sa dalaga.
“Analiza,” hinayng tubag sa dalaga nga misumpay dayon, “Taga dinhi ka, Sir?”
Miyango si Edmundo. “Ikaw, taga dinhi ka sa siyudad?”
“Dili. Taga probinsiya ko. Nia lang ko sa akong Tiya nga naa magpuyo sa dalan Asuzena. Taga Santa Monica ko,” ni Analiza nga nagpahiyom.
Samtang nagtutok nagtutok sa dalaga mipitik pagsubsob ang kasingkasing ni Edmund. Unya nananghid siya kang Analiza nga molakaw na. Misaad siya nga sa sunod higayon pakyawon gihapon niya ang baligyang mani niini. Mipahiyom pag-usab ang guwapang tindera.
MATAG gabii mahunahunaan gyud ni Edmund si Analiza. Ugaling lang ingon sa dunay babag unya kon iya kining higugmaon ug unya dad-on sa altar sa kaminyuon. Kon mahibawo ang iyang Papa ug Mama mosupak gyud sila nga si Analiza maoy iyang maasawa kay kabos kini. Tindera lang og mani.
Usa ka adlaw niana nahibaw-an ni Edmund nga wala na si Analiza. Miingon ang iyaan niini nga mipauli na kini sa Santa Monica. Miapas si Edmund.
Didto sa panimalay nilang Analiza gibati og tumang kahinangop ang dalaga nga miabi-abi sa ulitawo “Dayon. Dayon, Sir!” ni Analiza.
“Salamat, Ana,” ni Edmund.
Samtang nanglingkod sila sa sopa diha sa sala, ang ilang panag-estoryahay misangpot sa pagpadayag ni Edmund sa iyang gugma kang Analiza, maong ania siya miapas sa dalaga.
Mipahiyom si Analiza ug milubyok ang duha ka kandiis sa mga aping niini.
“May hinigugma ka na, Ana?” ni Edmund.
“Wala pa koy uyab, Sir. Ug...ug...” mikanga si Analiza.
“Ug unsa, An?” ni Edmund nga mitutok kang Analiza.
“Ug nahigugma pod ko nimo, Sir, sa una pa dihang nagka suki tas mani,,,” hinay nga namulong ang dalaga. Didto sa kasingkasing ni Edmund daw may daghang mga alibangbang nga nanglupad sa kalipay. Ug paglantaw niya sa layong langit daw may mga manulunda nga nanag-awit. Misinggit siya sa kalipay ug naggakos niya si Analiza. (KATAPUSAN)