SA BAG-ONG Tawag ng Tanghalan Celebrity Champs, niadtong Lunes ra ang akong nakit-an kay medyo na busy ang show.
Nakaingon ko dayon nga nindot ang maong ideya kay mahatagan og laing higayon ang mga celebrities kansang mga careers medyo nagmingaw sa lainlaing hinungdan.
Si Lance Raymundo nga naguba ang dagway sa una tungod sa usa ka aksidente sa gym nipakita nga naa pa gihapon niya ang gasa sa pag-awit.
Gipakita ni Vice Ganda, Amy Perez ug ubang mga hosts sa “It’s Showtime” ang ilang kalipay nga nibalik pagpakita sa iyang abilidad ang 2nd placer kanhi sa Pinoy Dream Academy, ang garbo sa Toledo City nga si Jay-r Siaboc (si Yeng Constantino ang grand champion).
Ako mismo nalipay sa maong kalamboan kay nakapakita si Jay-r kanhi nga di lang siya maayo mokanta, makamao usab siya moarte.
Nanghinaot sab ko nga mahatagan og proyekto si Jay-r sa iyang kanhi mother studio.
Didto hinoon paingon sa vocal coach nga si Thor Dulay ang swerte kay siyay nidaug.
Di sa pag-unsa pero nahibulong ko nganong naapil sa kategorya si Stephen.
Tungod ba kay taga-Showtime siya? Nangutana lang.
•••
Base sa reaction sa akong FB friends sa post nako bahin sa pagsigeg sul-ob og off shoulder outfit ni Janella Salvador sa The Killer Bride, daghan diay ming wala kauyon.
Sa ikaduha nakong post niingon ko nga morag nakabasa si Janella sa akong obserbasyon o kaha may nakahunghong niini kay pagka sunod gabii, binuktonan na ang iyang gipangsul-ob.
Sulagma ra gyud to pero duna gyuy usa nga nipahinumdom nako nga dili live ang programa ug nga sa niaging semana pa tingali na-tape ang maong episode. Haha! Syempre! Naninuod man siya uy!
•••
Usa ko sa nagpulaw adtong Dominggo sa gabii aron pagtan-aw sa konserto sa Aegis nga Doble Dekada.
Sa maong gidugayon, nindot pa gihapon paminawon ang mga awit sa tulo ka mga babaye nga tag-as kaayog tingog.
Bisan ang mga kanta sa ubang artists nga ilang gihatagag kinabuhi, nindot usab paminawon. Nilugwa sila si Karla Estrada, Jericho Rosales, Anne Curtis ug Vice Ganda isip mga guests.
Wa hinuon ko kahuman sa portion ni Vice kay di na madala ang dukâ. Nilang upat, si Anne ra gyud ang nagdalag tigaw.
Unsay nasulod sa iyang ulo nga nikanta man nig kanta sa Aegis nga, syempre, taas kaayog pitch.
Maayo pa sa pagsugod pero sa nadugay na, layo na sa tinuod nga tono ang kanta ni Anne.
Wala ko maka-monitor sa mga feedback sa nakakita sa performance. Wa sab ko kadungog ni Anne nga namahayag kabahin sa performance pero para nako, di to ikapasigarbo.
Gani angay kadto nga kalimtan sa labing daling panahon.