MIPAULBO og 29 puntos ang rookie nga si Zion Williams aron agakon ang New Orleans Pelicans ngadto sa kulbahinam nga 127-125 nga kadaugan batok sa Chicago Bulls sa ilang preseason games.
Nabiyaan og 23 puntos ang Pelicans apan mipahagsa kini og dakong rally sa fourth quarter ug ang three-pointer ni Nickeil Alexander-Waker maoy mitabla sa katapusang 1:34 segundos sa duwa ug ang iyang laing duha ka free throws maoy milansang sa kadaugan.
Siya mitapos sa duwa nga may 13 puntos ug pito ka assist.
Samtang mitali og 18 puntos si Derrick Rose nga may lima ka assists, midugang og 17 si Blake Griffin sa dihang gipukan sa Detroit Pistons ang Dallas Mavericks, 124-117. Ang kapildihan sa Mavericks mao usab ang naghatag og bating lama sa unang adlaw ni Kristaps Prozingis sa team.
Si Porzingis mitapos sa duwa nga may 18 puntos ug pito ka rebounds sulod sa 19 minutos nga maoy iyang unang pagduwa sukad niadtong Pebrero 2018 tungod sa iyang injury sa ACL.
Ang gitawag og wonder boy sa Dallas nga si Luka Doncic mikolekta og 21 puntos, walo ka rebounds, lima ka assists ug tulo ka steals.
Gipagtong usab sa Miami Heat ang Charlotte Hornets, 108-94, ubos sa panagkumboya nila ni Dion Waiters, Davon Reed ug Duncan Robinson kinsa pulos nakapabuto og upat ka tres.
Giputlan usab sa Orlando Magic ug pako ang Atlanta Hawks, 97-88. Si Terrence Ross nangulo sa Magic nga may 20 puntos.
Samtang gipawngan sa Milwaukee Bucks ug sonata ang Utah Jazz, 133-99. Sama sa naandan, si Giannis Antetokounmpo maoy nangulo sa Milwaukee nga may 11 puntos, 11 ka rebounds ug upat ka assists. Mitimang kaniya sila si Khris Middleton ug Brook Lopez nga pulos mihagdaw og 14 puntos. (JBM)