MIPUGA og 36 puntos si Ronan Bulawan aron ituboy ang Warehouse squad ngadto sa 104-89 nga kadaugan batok sa Garden Village sa 1st Tubo Master Construction and Services Basketball Tournament nga gipahigayon sa Barangay Basdiyot covered court, sa lungsod sa Moalboal niadtong Miyerkules.
Sa kadaugan, nakuha usab sa Warehouse ang katungod sa pagpakigsangka sa Admin team ugmang adlawa diin ang modaog maoy unang makasulod sa finals.
Sa laing duwa, kulbahinam nga gipatapsingan sa Beyond Island ang Bamboo Ville, 96-94. Si Isvec Gemino maoy nahimong best player of the game pinaagi sa iyang 26 puntos nga may duha ka assists ug usa ka steal.
Magsangka ang Beyond Island ug ang Garden Village alang sa knockout match diin ang modaog maoy makontra sa mapildi tali sa Admin ug sa Warehouse sa semifinal match.
Ang tournament nga gipasiugdahan ni Engr. Rodolfo Borja, chief executive officer ug chairman sa Tubo Master Construction and Services, gisugdan niadtong Dominggo.
Gisalmotan sa lima ka mga teams gikan sa nagkalainlaing buhatan sa nahisgutang kompaniya, ang kalihukan gitumong alang sa pagpahugot sa relasyon ug kamaraderya sa tanang mga empleyado sa maong kompaniya. (JBM)