SI PRESIDENTE Rodrigo Duterte miangkon nga aduna siyay gihambin nga chronic neuromascular disease nga gitawag og myasthenia gravis. Suma sa United States National Institute of Neurological Diseases and Strokes nga kini maoy mopahuyang sa skeletal muscles. Suma pa nga kining maong kondisyon maoy makapahuyang sa muscles nga mugrabe kon daghang buhaton ang tawo apan mo-ayo kon siya makapahuway. Ang kumon nga simtoma niini mao ang hanaphanap nga panan-aw, maglisud sa pagtulon, maglisud sa paginhawa, mausab ang sinultihan ug ang paghuyang sa mga bukton, kamut, tudlo, batiis ug liog. Wa pa masayri ang tambal alang niini.
Dili kini maoy unang higayon nga mipahibawo ang Presidente sa iyang gihambin nga mga sakit. Iya nang giangkon nga anaa siyay Barrett”s esophagus, Buerger’s disease kun paghubag sa iyang mga ugat tungod sa pagpanabako, migraine ug back pain human siya madisgrasya sa motorsiklo ug uban pa. Apan siya mi-insistir nga dili makamatay dayon kining maong mga sakit.
Nangayo ang mga kritiko og medical bulletin sa tinuod nga estado sa panglawas sa Presidente. Naa man gud sa Section 12 Article VII sa atong Konstitusyon nga kon adunay seryusong sakit ang presidente ang publiko kinahanglang pahibaw-on sa iyang tinuod nga state of health. Apan wa tingali siyay gihambin nga grabeng sakit. Makita nato nga kakugihan ni Duterte nga mobisita sa mga dapit nga nagkinahanglan sa iyang presensiya bisan gani ang pagbiyahe sa laing nasud. Misaad usab siya nga mismo siya maoy moangkon kon seryoso na ang kahimtang sa iyang panglawas. Mas makaayo sa seguridad, kahusay ug kalinaw sa nasud kon ato na lang huwaton hangtud nga mahuman ang termino ni Pres. Duterte kay sa pagpanghinaut sa iyang kadautan.
•••
Ako sayod nga wa makauyon ang ubang mga sakop sa PDP-Laban niining akong pagpatik dinhi sa dili maayong relasyon nila ni Cebu City Mayor Edgardo Labella ug ni Bise Mayor Mike Rama. Nagtuo tingali ang uban nga nangintriga lang ko sa relasyon sa duha ka dagkung opisyal sa Siyudad. Kadtong akong gitug-an pinaagi niining atong lindug gikan sa mga kasaligang tinubdan sud mismo sa ilang partido.
Karong bag-o, usa ka inilang barangay kapitan sa siyudad ang mikompisal kanako nga daghang mga kapitan nga sakop sa PDP-Laban nangreklamo na sa panagbingkil sa duha ka mga lider. Sa usa sa ilang panagtigum, suma niya, ilang gihulga sila si Labella ug Rama nga kon magpadayon kining ilang dili maayong relasyon, mamalhin sila sa BO-PK. Mangayo ko og pasaylo apan wa ako mangintriga kay igo lang akong nagsulti sa tinuod.
Kalabot sa umaabot nga local election sa 2022, atong nasayran nga ang anak ni Kongresista Bebot Abellanosa maoy mopuli kaniya nga batukan gihapon ni kanhi konsehal Joy Pesquera. Gitohuan nga si Kong. Bebot maoy modagan sa pagka-mayor ubos sa BO-PK. Sa North, si Cutie del Mar modagan pagbalik puli sa iyang amahan. Si Richard Yap modagan gihapon sa maong posisyon. (mannyrabacal1144@gmail.com)