Barrita: Saad sa mga politiko

USA ka politiko nidagan sa pagkamayor. Ug sama sa kadaghanan sa mga kandidato, misaad siya sa mga mehoras ug mga kaayohan nga madawat sa katawhan, labi na gyud sa mga kabus nga maoy kadaghanan sa mga botante.

Lakip na niini ang direkta nga cash transfer sa mga kabus nga di na moagi sa mga middlemen aron way kurakot. Sama kini sa 4Ps, ang Pantawid Pamilyang Pilipino Program, nga gigahinan og binilyon ka pesos matag tuig.

Apan sa dihang nidaog ug nakalingkod na, wa siya makatuman sa iyang mga saad. Busa, niadtong Miyerkules, gisulong sa mga mag-uuma ang munisipyo, gibinaklid paggapos ang mayor, gidala sa gawas, gigaid sa luyo sa usa ka pickup truck ug gipaguyod.

•••

Naguyod na ang mayor og pipila ka dosena ka metro sa dihang naabot ang mga sakop sa kapulisan ug mga kawani sa munisipyo nga maoy miluwas kaniya. Maayo na lang nga wa siyay nahiaguman nga kadaot sa lawas.

Maayo na lang sab nga didto kini mahitabo sa lungsod sa Margarita, estado sa Chiapas didto sa nasod sa Mexico. Sa akong tan-aw, di kini mahitabo sa Pilipinas kay ang mga botante dali rang makalimot sa saad sa mga politiko.

Way mga botante nga nagbaton og kaisog sa pagpaningil sa mga mananaog sa eleksyon sa ilang mga gisaad. Labi pa kon nakadawat sila sa mga pahalipay, sambingay sa vote buying, panahon sa eleksyon.

•••

Ang dul-an 100 ka mga vendor nga gipapahawa sa dalan Colon ug Osmena Boulevard subling nagrally sa Plaza Sugbo atubangan sa Cebu City Hall aron hangyuon si Mayor Edgardo Labella nga pabalikon sila sa pagpaninda sa ilang kanhi pwesto.

Nangayo sab silag tabang gikan sa Siyudad kay grabe ang ilang nasinating kalisod sulod na sa tulo ka buwan nga wa silay klarong halin sa ilang bag-ong puwesto sa Tabo Sa Banay ug sa F. Gonzales Street.

Naningil sila sa saad sa mayor nga makabalik sa pagpaninda. Kini maoy angay nga klaruhon. Ang saad nga makabalik silag pagpaninda natuman na. Apan nisaad ba ang mayor nga makabalik silag paninda sa Colon Street ug Osmena Boulevard?