SUPERBALITA CEBU

Editoryal: Kahakog diay

Editorial Cartoon by John Gilbert Manantan

NAKADAWAT og dakung umento ang kapulisan human gituman ni Presidente Rodrigo Duterte ang iyang saad sa halos pagdoble sa sweldo sa kapulisan aron mawagtang ang kurapsyon.

Apan hayan nasayop ang Presidente kay wa man makawagtang sa kurapsyon ang iyang lakang kay nagpadayon gihapon ang hiwi nga mga pulis sa ilang binuhatan, sama sa pag-recycle og drugas nga maoy hinungdan nga gitawag sila og ninja cops.

Nitumaw gani nga bisan dagko nga mga opisyal sa Philippine National Police (PNP) nagbinuang sa katungdanan.

Gawas aning ninja cops, naa usab kining mga pulis nga protector sa kriminal nga mga grupo. Pila na man ka mga higayon nga dunay mga engkwentro sa pulos mga pulis kay dunay nangapil sa mga krimen, sama sa kidnapping ug tulis?

Bisan sa Dakbayan sa Sugbo, bag-ohay lang nga dunay mga pulis nga gipang-imbestigar human masakpi nga nang-recycle sa drugas nga ilang nasakmit.

Nitumaw usab ang mga estorya sulod sa PNP nga nidaghan ang mga pulis nga namabaye tungod kay nidaku ang sweldo.

Sa ato pa, di sweldo ang isyu nganong dunay kurapsyon sulod sa PNP. Ang kahakog sa tawo sa kwarta diay ang hinungdan nganong dunay kahiwian sulod sa organisasyon. Kay kana bitawng dagkong mga opisyal, dako man unta og sweldo. Apan nganong duna man gihapoy mga kurakot, dinagko pa ang dawaton nga protection money?

Makita bitaw ni sa ubang mga buhatan sa kagamhanan, diin mismo dagkong mga opisyal nanawat og minilyon nga suburno gikan sa mga kontraktor ug uban pang nanulod og mga proyekto sa kagamhanan.

Kon naa sa usa ka tawo ang kahakog ug magpasulabi kini og maayo, bisan himuon pang minilyon ang sweldo matag buwan sa kapulisan, magpadayon gihapon ang kahiwian sulod sa ilang organisasyon. Ang problema naa sa tawo, wa sa sweldo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph