KINATIBUK-ANG 16 ka tim magtigi sa titulo ug luna alang sa Mindanao finals ang nakasugal sa pagsugod sa 2019 Collegiate Sponsors League Escandor Cup alas 1 sa hapon sa Dominggo, Oktubre 13, sa Davao City Recreation Center.
Si Samahang Basketbol ng Pilipinas (SBP) 11 operations head Ronel Leuterio nagbutyag niini atol sa Davao Sportswriters Association (DSA) Forum sa The Annex of SM City Davao Huwebes, Oktubre 10.
Matud niya nga mga tim tungaon sa duha ka brackets sa elimination round aron nga madeterminar ang quarterfinalists, semifinalists ug finalists.
“This is something comparable to UAAP and Cesafi. We’ll try to make it big with school teams having corporate sponsors. This will give homegrown talents to play here instead of going to Manila,” matud ni Leuterio, kon diin dugang nagsulti nga ang kampeyon sa siyudad moabante ngadto sa Mindanao finals gitakda sa Enero.
Ang kampeyon magrepresentar sa Mindanao ngadto sa national championship batok sa UAAP, NCAA ug Cesafi champions.
Ang Bracket A nga mga tim mao ang Holy Cross of Davao College, Agro-Industrial Foundation College of the Philippines, DMMA College of Southern Philippines, University of Mindanao (UM)-Main, Mats College of Technology, San Pedro College, Cor Jesu College of Digos ug John Paul II College of Davao.
Magduwa sa Bracket B mao ang Jose Maria College, UM-Peñaplata, Brokenshire College, Rizal Memorial College, Holy Cross of Sasa, Ateneo de Davao University, Philippine Women’s College ug Aisan International School of Aeronautics and Technology.
Mga duwa sa pagbukas, magtigi ang UM Main batok sa HCDC sa 1:30 sa hapon, Addu batok HCCS sa 3 sa hapon ug JMC batok RMC sa 4:30 sa hapon.
Ang liga girepresentahan ni SBP regional director Glenn Escandor ug gipaluyohan sa Davies Paints, The Royal Mandaya Hotel, Mandarin Tea Garden SPC Branch, Max’s Restaurant ug PTT Lubricants. (MLSA)