BISAN kon wala pay pormal nga order gikan kang Philippine National Police Chief Director General Oscar Albayalde, gipahibawo na sa director sa Police Regional Office 7, Brigadier General Debold Sinas, nga adunay dakong opisyal sa Camp Crame nga nitawag kaniya aron ipahibawo nga hulipan na siya sa katungdanan sa sunod semana.
Gipasidan-an na siyang daan nga siya ang mangulo sa National Capital Region Police Office nga giingung biyaan ni Police Major General Guillermo Eleazar nga mosaka usab sa iyang posisyon.
Karong Lunes, gipatawag ang tanang regional director sa kapulisan lukop nasud alang sa usa ka command conference sa Malacañang uban ni President Rodrigo Duterte.
Dinhi masayran ang order kaniya ug kinsa usab ang ihulip kang Sinas.
Wa na masurpresa pa si Sinas tungod sa umaabot nga pagretiro sa katungdanan ni Albayalde sa Nobiyembre 8.
Ning buwana, moretiro usab ang number 2 sa PNP nga kinahanglan nga hulipan sa labing senior PNP officer hinungdan nga maapektohan usab ang tanang regional offices.
“I am very thankful, of course, to God, to the Chief PNP, and to my people here in PRO-7 for at least assisting me. Well, I’m happy and I have mixed feelings,” matod ni Sinas.
Wa siya magtuo nga masayo ang pagsaka sa iyang karera.
Gusto pa unta siya nga mangulo sa PRO-7 alang sa Sinulog 2020. Apan tungod kay mabakante man ang posisyon sa NCRPO, kinahanglan nga iya kining dawaton, gawas kon di na siya magpa-promote.
Wa pay ngalan ang mohulip kaniya, apan ang iyang deputy regional director for administration nga si Police Colonel Ildebrandi Usana maoy officer-in-charge.
Drugs
Sukad milingkod si Sinas niadtong Hunyo 1, 2018 hangtod Octobre 9, 2019 miabot na sa kapin sa 189 kilos sa gituohang shabu ug 485 kilos sa marijuana ang ilang nasakmit.
Base sa Dangerous Drugs Board (DDB) value, mobalor ang tanan og kapin P1.3 bllion.
Moabot usab og 14,223 ka drug personalities ang ilang nadakpan sa 9,966 ka anti drug operation.
Niini, 313 ang high value targets, usa ka libo ang street level samtang ang uban naa sa watchlist sa matag police office.
Niabot usab sa 136 ka tawo ang namatay sa subsub nga kampanya batok sa illegal nga drugas human misukol sa operation.
Ang labing bag-o ang duha ka drug personalities sa Barangay Bangbang, lungsod sa Cordova niadtong Miyerkules sa hapon, Oktubre 9.
Sa wa pa siya moatubang sa media, iyang gipatawag ang tanan niyang opisyal sa kapulisan aron ipahibawo nga sa sunod semana di na siya ang regional director sa PRO-7.