SUPERBALITA CEBU

Mga proyekto sa panglawas gipasigarbo ni Mayor Chan

PAKIGPULONG NI AHONG: Puno ang Hoops Dome sa dakbayan sa Lapu-Lapu atol sa pakigpulong ni Mayor Junard Chan bahin sa iyang nabuhat sulod sa unang 100 ka adlaw sa pwesto. (Alan Tangcawan)

GIBANABANANG 4,000 ka mga tawo nga dumadapig, higala, kabanay, konsehales, empleyado sa City Hall ug uban pa ang ningtambong sa pakigpulong ni Lapu-Lapu City Mayor Junard “Ahong” Chan atol sa iyang ika-100 ka adlaw isip mayor sa dakbayan kagahapon, Huwebes, Oktubre 10.

Human matag Huwebes sa hapon ang sisyon a konseho sa dakbayan, usa ka special session ang gipahigayon sa Hoops Dome sa Brgy. Gun-ob aron mahatagan si Chan og kahigayonan nga mapadangat ang iyang mga nabuhat sud sa 100 ka adlaw ngadto sa mga Oponganon.

Sukwahi niadtong unang privilege speech sa mayor sa konseho dihang milingkod siya isip mayor sa dakbayan nanambong ang mga konsehales nga nailang kaalyado ni kanhi mayor ug karon Kongresista Paz Radaza.

Sama sa gipaabot giladlad ni Chan ngadto sa mga Oponganon ang iyang nabuhat sa unang 100 ka adlaw niya sa serbisyo nga sagad libre.

Ang maong plata-porma maoy saad ni Chan niadtong milabayng eleksyon.

Ubos sa iyang administrasyon libre na ang patambal ug pakonsulta sa city health ug city hospital.

Gipasigarbo niya nga ubos sa iyang adminsitrasyon nahuman na ang Phase 1 sa laing building sa Lapu-Lapu city District Hospital nga gikatakdang makabaton na og Malasakit Center diin moabot sa P4 milyones ang pundo matag buwan pinaagi ni Senador Bong Go.

Libre na usab ang pakasal ubos sa iyang administrasyon diin moabot na sa 26 ka paresan ang iyang nakapasal na.

Libre na usab ang operasyon sa cataract sa mga senior citizen sa usa ka pribadong a Barangay Agus.

Karong umaabot piyesta sa Lapu-Lapu sa sunod buwan, laing mass wedding ang iyang ipahigayon diin libre usab ang salosalo inig kahuman.

Nahatagan usab niya ug tag P1,000 nga pahalipay ang matag senior citizen nga mag-birthday inay tagaan kini og cake.

Giklaro usab ni Chan nga ubos sa iyang administrasyon walay Person With Disabilities (PWDs) ang iyang gitaktak ug gani nangita pa siya ug dugang mangaplay sa ubos sa iyang administrasyon.

Gihimug-atan usab ni Chan nga walay demolition nga mahitabo ubos sa iyang termino kun walay relocation.

Gani iya nang gilihok ang socialized housing sa mga sakop sa urban poor aron aduna na silay hamugaway nga kapuy-an sama sa 25 ka ektaryang luna sa Brgy Canjulao ug ubang barangay nga mao ang Subabasbas ug Pajac.

Nunot sa subsob nga kampanya ni Presidente Rodrigo Duterte sa ilegal nga drugas gipasigarbo niya ang ang pagkamugna sa City Of Lapu-Lapu Office of Substance Abuse and Prevention (C-Losap) nga miresulta sa pagka drug-free sa Barangay Caohagan ug pagkataktak sa mga mogamit og gidiling drugas nga mga empleyado sa city hall.

Damgo ni Chan nga hingpit nga ma-drug free ang tanang barangay sa dakbayan.

Nakadayeg si Chan sa nabuhat sa kapukisan batok sa ilegal nga drugas nga miresulta sa pagkasikop sa moabot 332 ka mga drug personality ug pagkasakmit sa moabot 1,571.1 gramos sa ilegal nga drugas.

Gitagaan usab ug gibug-aton sa mayor ang kaayohan sa mga tinun-an sa Lapu-Lapu City College pinaagi sa paghatag kanila ug P40,000 nga cash allowance lakip na ang pagbutang og free wifi sa tunghaan.

Nasulbad usab ang baha sa pipila ka mga lugar sa dakbayan sama sa Datag, Maribago pinaagi sa pagpadali sa drainage projects..

Kining tanan pasiuna pa lang, sumala sa mayor, sanglit sa musunod 995 ka adlaw sa iyang termino daghan pa og proyekto ug programa ang iyang ipatuman sa mga Oponganon sama sa pagbaton unya ug city bus, pagbuhat ug pampublikong sam-ang sa isla sa Olango, paghatag ug tag P3,500 assistance sa senior citizens, P2,000 sa PWD’s ug P4,000 sa magtutudlo. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph