PADAYON ang manhunt operation sa mga sakop sa Provincial Intelligence Branch sa kanhi pulis nga nag absent without official leave (AWOL).
Ang pulis target sa anti drug operation niadtong Miyerkules sa hapon, Oktobre 9, sa barangay Bangbang, lungsod sa Cordova.
Matod ni Police Colonel Roderick Mariano, direktore sa Cebu Provincial Police Office nga si Lowel Pacallago, naila sa ilang dapit nga Boyet, nalakip sa ilang target list sukad pa kaniadto.
Si Police Regional Office Director Brigadier General Debold Sinas niingon nga gi monitor na nila si Pacallago human masuta nga naa sa watch list.
Niadtong June 2016, sa paglingkod sa katungdanan ni Presidente Rodrigo Duterte, nag Awol si Pacallago sa kahadlok tungod sa kalambigitan niini sa illegal nga drugas.
Nakasulod sa serbisyo sa PNP si Pacallago niadtong 2008 ug pagka 2009 nadestino sa Regional Mobile Group.
Paglabay sa pipila ka tuig, nadestino siya sa Dakbayan sa Lapu-Lapu.
Ang katapusan niya nga assignment sa Station 5 sa Barangay Pusok.
Samtang aktibo pa sa serbisyo, namaligya na kini sa illegal nga drugas samtang nadestino sa City Intelligence Branch sa Lapu-lapu City Police Office sa wa pa ang 2016 presidential elections.
Sukad kini nag Awol, sigun sa monitoring sa kapulisan sa Probinsya sa Sugbo, nagpadayon siya sa illegal nga negosyo ug midako pa sa milabay nga mga buwan.
“I think that’s the reason ata siya nga nag awol because naa sa watch list siya. Karon nataymingan after of series of follow up, siya ang usa sa mga subject sa buy bust unta,”matod ni Sinas. (AYB)