PAGRASYON sa tubig sa mga dapit nga nihit o way supply gihimo na sa Siyudad sa Talisay.
Ang Bureau of Fire Protection (BFP) ug Talisay City Disaster Risk Reduction and Management Office gitahasan sa Kagamhanan alang sa pagrasyon sa mga lugar nga nagkulang na og tubig.
Bisan gani mga comfort room sa Talisay City hall, apektado sa kakuwang sa tubig.
Way agas ang gripo hinungdan manu-manu ang pagkabo sa tubig gikan sa barel.
Aduna nay pahibawo nga gipaskin sa mga CR nga way agas hinungdan nga di angay mag-usik-usik sa tubig.
Lakip ang Talisay City hall ug plaza girasyonan og tubig sa kabomberuhan ug TCDRRMO.
Matod ni SFO2 Marcelino Aguilar sa Talisay City Fire Station nga sa duha na ka semana sugod niadtong Septiyembre 27, ika-upat na nakapangayog tabang ug nahatdan ang Bureau of Jail Management Penology (BJMP) alang sa prisohan sa Barangay Maghaway.
Sa Miyerkules, Oktubre 9, duha ka tankers sa tubig ang napadala alang sa female dormitory.
Giangkon usab ni Talisay City Mayor Gerald Anthony Gullas, Jr. nga mas nagkadaghan usab ang ilang nadawat nga reklamo gikan sa Talisaynon kalabot sa problema sa tubig, ilabi na ang gikan sa Metro Cebu Water District (MCWD). Buot sa mayor nga madungog gikan sa kadagkuan sa MCWD ang short ug long term solution.
Hinungdan usab nga nipatawag ang konseho sa dakbayan sa Talisay sa representante sa MCWD aron mohatag og pagpasabot atol sa ilang session.
“Of course I have been receiving a lot more of complaints because of lack or shortage of water. Kami karon nanawagan lang gyud sa MCWD to figure out a way. It is their mandate unsay angay buhaton para mahatagan og tubig ang supposedly source sa tubig nila,” saysay sa mayor.
Liloan
Si Liloan Mayor Christina Garcia Frasco mireklamo sa pahibawo sa MCWD nga dunay taas nga pagkapakgang sa supply sa tubig sa Liloan, Consolacion, Lapu-Lapu, Mandaue ug mga dapit sa Dakbayan sa Sugbo karong adlawa, Oktubre 11, tungod sa giingong power interruption sa Visayan Electric, nga iyang gihulagway nga “misrepresentation.”
Matod ni Frasco nga human siya mahibawo, napakisayod siya sa Visayan Electric.
Didto niya nahibaw-an nga sa 18 ka mga well sa MCWD sa Liloan, lima lang ang mangaapektuhan sa power interruption. Usa sa lima ka wells ang wa na gani magamit.
Siya nangutana nganong gipatuo sa MCWD nga ang tanang wells maapektuhan bisan kon upat lang niini ang maigo.
“In any event, the simplest question is, facing such an impending disaster of no water for Cebu because of power interruption, why doesn’t MCWD provide generators for the 4 affected Liloan wells? Our LGU Engineering has reported that there are 2 generators already in MCWD’s other wells in Liloan. Why not use those and just add 2 others in order to avert the water service interruption?,” pangutana ni Frasco sa MCWD sa iyang Facebook post. (FMD & REV)