Bata, 8, napantok, patay

BISAN diay sa tradisyunal nga duwang Pinoy, dunay nag-ung-ung nga kakuyaw nga posibleng mokalas og kinabuhi.

Sama sa nahitabo sa 8 anyos nga batang lalake, kinsa napantok ang ulo sa semento dihang nahulog sa stage samtang nagduwa-duwa sa “Langit Lupa.”

Kini nahitabo niadtong Miyerkulis sa alas 12:15 sa udto, Oktubre 9, sa sulod sa Guadalupe Elementary School, Brgy.Guadalupe, Dakbayan sa Bogo.

Si Ryan Jay Maloloy-on Loreto, tinun-an sa Grade 2, gideklarar nga dead-on-arrival sa Cebu Provincial Hospital sa Bogo City.

Si Supt. Emelie Santos, hepe sa Bogo City Police Station nga nahinabi sa Superbalita Cebu, nagkanayon nga si Loreto nagduwa-duwa uban sa iyang mga classmate nianang pagka-udto sa stage sa eskwelahan.

Apan ang tumang kalipay sa mga bata natabunan sa kasub-anan human kalit nga natumba si Loreto samtang nag-ambak-ambak ug napantok ang ulo sa sawog nga semento.

Matod ni Santos nga sa post mortem examination ni Doktor Almira Lynn V. Ancajas, attending physician, si Loreto namatay sa cardiac arrest.

Duna say previous history nga si Loreto sungguhon.

Si Santos nipadayag nga disgrasya ang nahitabo.

“Nag-ambak-ambak daw ni sila. Unya na outbalance seguro to siya sa pagtugpa, maong napantok iyang ulo,” dugang ni Santos.

Sa duwa nga “Langit Lupa,” ang “buang” di makagukod sa iyang mga kaduwa kon nagtungtong sa ibabaw, sama sa bench, lingkuranan o bisan unsa nga di matugkad sa yuta ang mga tiil. Kon matugkad sa yuta ang player, siya gukdon sa “buang.”

Kon siya madakpan sa “buang”, siya na usab ang “buang” ug manggukod niadtong naa sa yuta nakatunob.

Sumala pa ni Santos nga ang mga ginikanan ilang gisabot una karon nga naa sa kasub-anan hinungdan nga wa sila mag-imbestigar una.