PATAY dihadiha ang usa ka 27-anyos nga Indian national nga tigpatanto human pusila sa wa mailhing mamumuno sa Sitio Iba, Barangay Basak, dakbayan sa Lapu-Lapu, pasado alas 9:00 kagahapon sa buntag, Biyernes, Oktubre 11.
Ang biktima nailhan pinaagi sa iyang identification card (ID) nga si Cacandeep Singh, 27, nagpuyo sa Sitio Abuno, Barangay Pajac sa samang dakbayan.
Si Singh sakay sa iyang motorsiklo ug naningil unta sa mga utangan niya sa sudlonong bahin sa nahisgotang lugar dihang kalit nga gipusil sa usa ka wala mailhing lalake, kinsa giingong nagsul-ob lang og kawo ug short pants.
Tulo ka mga samad pinusilan sa iyang dughan ang naangkon sa biktima gikan sa wala pa matinong kalibre sa armas nga hinungdan sa iyang kamatayon.
Matod ni Police Major Juan Capacio, hepe sa Marigondon Police Station, nga posible gayud nga giatngan ang biktima sa suspek.
Posible usab nga ang pagpusil ra sa biktima ang tuyo sa suspek sanglit wala may gamit ang biktima nga gihilabtan lakip na ang kuwarta niini.
Giingong yano nga nilakaw ang suspek human sa pagpamusil paingon sa mga interior portion sa dapit.
“Di pud tulis (ang tuyo) kay naa ra ang iyang kwarta, mahug ra gyud to nga revenge ug naa ba siyay nakaaway,” matod ni Capacio.
Naghatag karon og kalisod sa kapulisan sa ilang pag-ila sa suspek sa pagpamusil mao nga walay andam makig-alayon kanila nga mga saksi bisan kun daghan ang nakakita sa pagpamusil.
Nunot niini, gikatakdang hinabion pa sa kapulisan ang mga kaubang Indian national sa biktima nga mga tigpatanto usab aron ilang masuta kung wala ba nakahisgot ang biktima ngadto kanila nga aduna kini nakaaway sa dapit.
Hinuon, walay record sa kaulisan ang biktima sa ilang area of responsibility (AOR).
“Mao nay problema kay bisag daghan nakakita wala may maningog kani gyud nuong mga in-ani (mga Indian national) wala gyud ni sila lain buhat kundi kana lang magpautang,” matod ni Capacio.