NAPAKYAS pagpakasal sa unang kapuyo nga si Lovely si Paolo “Polong” Duterte. Tinubagay sa iyang anak nga si Isabelle pagpalitrato nga engrande sulod sa Malacañang nga nakaani og pagsaway sa social media. Gilambigit sa 6.4B pesos palusot nga shabu sa Bureau of Customs (BOC). Miluwat nga bise mayor sa Davao.
Okt. 2017 ang Ombudsman misusi sa alegasyon nga ang pagpagawas og shabu sa pwerto sa Manila gipaluyohan sa Davao group sumala sa customs fixer Mark Taguba. Sa hawanan sa senado si Taguba mibutyag nga sa shabu shipment sa Agusto 2017 maoy iyang kontak sila Tita Nanie ug Jack sa Davao group nga migamit sa ngalan ni Polong ug brother-in-law Manases Carpio. Miangkon si Taguba nga iyang gikatagbo si Konsehal Nilo Abellera Jr. sa Davao sa Enero 2017 nga nanghingi og 5B pesos silbing protection money sa maong kontrabando sa batan-ong Duterte. Gipalagpot si BOC Chief Nicanor Faeldon hinoon gitudlo nga deputy administrator sa Dept. of National Defense ug direktor heneral sa Bucor nga gitaktak na sab gumikan sa nakontrobersyal nga GCTA. Sila si Polong ug Manases kusganon sab nga mikiha ni Sen. Antonio Trillanes nga milambigit kanila sa shabu ug rice smuggling. Lain sab ang alegasyon ni Trillanes sa tinagoang bahandi sa pamilyang Duterte.
Napukaw ang shabu smuggling sa laing palusot nga 6.8B pesos gikan sa Taiwan nga giputos og magnetic lifters ubos na sa pagdumala ni BOC Chief Isidro Lapeña. DOJ mimando sa NBI sa pag-inbestigar. Gisundan sa 1.8B pesos drug shipment ubos na sab ni BOC Chief Rey Leonardo Guerero hinoon si Sen. Ping Lacson mihingalan sa usa ka Insek nga si Zhijian Xu alyas Jacky Co nga gideklarar nga plastic resin.
Si Col. Eduardo Asierto nagtago-tago human milambigit sa pamilyang Duterte sa sindikato sa drugas. Mitumbok nga gipatay si Maj. Lito Quirote gumikan sa mao gihapong pasangil. Mitumaw si Peter Advincula alyas Bikoy nga miangin sa drugas nila ni Polong, Manases, Bong Go sa Davao ug Quadrangle group. Gisanta ni Sen. Tito Sotto kay notado nga magpabayad sa iyang mini nga inpormasyon. Nasubay nga si Bikoy nabilanggo og unom ka tuig sa Marikina City sa large scale illegal recruitment. Hangtod nga nangayog pasaylo si Bikoy kay sinugo ra diay siya nila Trillanes, Vice Pres. Leni Robredo, uban pa. Gani ang CIDG mipasaka nag kasong sedition batok Robredo ug 35 ka kauban nga migamit ni Bikoy.
Wala mamatud-i ug wala mosalir ang mga pasangil batok ni Polong. Napiling kongresista sa Davao diin mikuyog kaniya ang 30 ka mga magbabalaod sa PDP Laban paglayat ngadto sa NUP. (csa_1156@yahoo.com/09064648954)