NAKASUGAT og kalisdanan ang kampanya sa paghawan ug pagpanglimpiyo sa mga sidewalks ug kadalanan sa dakbayan sa Sugbo.
Kini tungod kay hangtod karon pipila ka mga vendors nga nanga-apektuhan ang nag-rally ug nanghangyo nga unta pabalikon sila sa ilang naandang puwesto.
Ang nahitabo gud, kay sa dihang mimando si Presidente Rodrigo Duterte nga hawanan ang mga sidewalks ug mga kalsada aron hingpit kini nga mahibalik ngadto sa katawhan, sa way langan-langan, ang mga LGU yanong misanong niini, lakip ang Cebu City.
Kadtong dili makatuman suspensuhon sa Department of the Interior and Local Government (DILG).
Sukad niadtong naghinapos nga bahin sa Septiyembre, ang dakbayan padayon nga mituman sa memorandum sa DILG ug tuod man wala nay mga sidewalk vendors nga atong makita ilabi na sa dalan Colon ug Osmena Boulevard.
Pero niadtong Martes, sa iyang press conference, si Cebu City Mayor Edgar Labella mibutyag nga iyang tugotan ang mga sidewalk vendors nga makabalik sa ilang puwesto, ug ning higayona aduna na silay mga lagda nga ipasunod.
Kini agi’g tubag sa pipila ka mga vendors nga mibisita usab sa iyang buhatan.
Atong gisabot ang simpatiya sa mayor kay lagi panginabuhi man sa mga gagmayng manindahay ang nakapusta niini, apan klaro nga nahisupak kini sa gimando sa presidente.
Kon ipadayon man kini ni Labella, dili halayo nga mahibalik na usab ang kasamok sa mga sidewalk ug kalsada ilabi na og mosakay ang mga abusado ug illegal nga mga vendors.
Magbutang usab kini sa mayor sa apiki nga sitwasyon kay mahimo man kining kapasikaran sa iyang posibling pagkasuspenso.
Dinhi masukod ang political will ni Labella. Isip mayor, kinahanglan hugot ug dili siya mag-usab usab sa iyang desisyon. Kon nahimo kini sa uban way rason nga dili niya kini mahimo.