LAUMAN ang mas bongga ug nindot pa nga Buso Hot Spring Park human ang Department of Budget and Management (DBM) miapruba sa pagpaguwa sa P15 million nga badget alang sa rehabilitasyon.
Ang badget gihangyo ni Mati City Mayor Michelle Nakpil Rabat.
Nasayran nga Oktubre 4, si DBM Acting Secretary Wendel Avisado mipahibawo ni Mayor Michelle nga ang Special Allotment Release Order (Saro) na-isyu na sa Bureau of Treasury, Septyembre 26.
Agosto 8 ning tuig, ang mayora mipadala og suwat kang Presidente Rodrigo Duterte nga naghangyo og pinansiyal nga ayuda alang sa proyekto.
Pagkasunod adlaw, si Mayor Michelle personal nga miduaw sa buhatan ni Sec. Avisado alang sa maong katuyuan.
Ug sobra bulan lang ang milabay, ang badget naaprubahan ug napaguwa.
Ang Buso Hot Spring Park gitukod niadtong dekada 90 ug maoy nailhang tinubdan sa hot spring sa siyudad.
Dugang sa mayor nga gikinahanglan ng i-rehab ang park tungod sab sa daut na niining pasilidad.
Kung matapos na ang rehabilitasyon, lauman nga ang Buso Hot Spring Park mosunod nga tourist attraction sa Mati. (PR)