GIKASUBO sa amahan sa dakbayan sa Panabo ang paglugos sa usa ka Grade 1 nga estudyante sa dapit, Oktubre 10 ning tuig.
Apan gipaneguro ni Panabo City Mayor Jose Relampagos nga mahatag ang hustisya alang sa biktima.
Biyernes, Oktubre 11, nagpaabot si Mayor Relampagos og pahayag bahin sa nahitabong rape niadtong Huwebes sa usa ka menor de edad nga estudyante. Para sa kasayuran sa tanan, nagpadala ang mayor og assistance sa biktima ug sa pamilya.
“Akong gikondena ang nahitabong rape sa usa ka Grade 1 nga estudyante gahapon sa udto, Oktubre 10, 2019. Subo kaayo paminawon isip usa sab ka amahan nga himuon ni sa atong anak,” pahayag sa mayor nga naka-post sa City Government of Panabo Facebook page.
Dugang sa mayor nga human maabot kaniya ang report, gilayon niyang gimandoan ang kapulisan sa siyudad nga dakpon ang suspek.
Suma pa, wa mahuman ang adlaw nasignit ang rapist sa palengke sa dapit.
“Naka-detain siya karon sa PNP station. Karon seguraduhon nako na mahatagan og hustisya ang biktima,” dugang sa mayor.
Sa Facebook post sa usa ka netizen, giingong ang pag-rape sa estudyante nahitabo sa Little Panay sa Panabo.
Sa pikas bahin, mihangyo sab ang mayor sa mga ginikanan nga paneguraduhon ang seguridad sa ilang mga anak, padung ug pauli gikan tunghaan.
“Kauban sa grasya sa Ginoo, sa akong termino walay kriminal makalusot ug walay dautan moabot sa atong katawhan,” pasalig sa mayor.
Kahinumdoman nga subay sa gihimong imbestigasyon sa Panabo Police Station, nasayran nga bandang alas 5 sa hapon niadtong Huwebes, gisaysay sa biktima nga 6-anyos nga Grade 1 pupil nga gilugos siya sa usa ka traysikad drayber nga nagsul-ob og pula nga t-shirt ug naka-long pants nga dunay sling bag sa plantasyon nga bahin sa sagingan sa Barangay Little Panay.
Daling giadtoan ni Police Staff Sergeant Gina Calisar, uban sa patrol team, pangulohan ni Police Major Sergeant Sunico ang nahisgutang lugar ug narekober ang sapatos sa biktima ug ang nagkadugo nga sinina nga kolor red nga giingong gipanag-iyahan sa suspek.
Nakadiskobre sab ang mga pulis og lama sa dugo sa sagbuton nga bahin kon diin ang biktima giingong gipanamastamasan.
Human makompirma ang hitabo pinaagi sab sa saysay sa saksi nga nihaum sa pahayag sa biktima, gilusad gilayon ang hot pursuit operation nga niresulta sa pagkasikop sa suspek nga giilang si Daniel Plazo Ebay, 25, ulitawo, molupyo sa Prk. 6, Barangay Maduao, Panabo City.
Ang suspek priso sa Panabo CPS alang sa saktong disposasyon ug pagpasaka og tukmang kaso.