NAA sa seryusong kahimtang ang posibleng makontra ni Filipino boxing icon Manny Pacquiao nga si Errol Spence Jr. human kini naaksidente sa kadalanan sakay sa iyang sakyanan kagahapon sa Dallas.
Si Spence, kinsa maoy tag-iya sa World Boxing Council (WBC) ug International Boxing Federation (IBF) welterweight titles, grabeng naangol human nabangga ang iyang Ferrari sa Riverfront Boulevard, taho sa FOX News.
Gikataho nga nalabay si Spence gikan sa iyang sakyanan gumikan kay wala kini nagsul-ob og seat belt.
Gidala si Spence sa Methodist Dallas Medical Center. Grabe man tuod ang iyang pagkaangol apan anaa ra kini sa luwas nga kahimtang. Dili pa lang dugay, gilupig ni Spence si Shawn Porter sa usa ka unification bout. (ESL)