MGA duwa karon:
(Alodome, Aloguinsan)
Volleyball:
2:00 pm. - Barili vs. Balamban
3:30 pm. - Aloguinsan vs. Asturias
Basketball:
5:30 pm. - Barili vs. Balamban
7:00 pm. - Aloguinsan vs. Asturias
Hugot nga panagsangka ang gipaabot nga masaksihan sa dihang mag-ilog sa temporaryong liderato ang Barili Toros ug Balamban Ship Builders sa pagpadayon sa bag-o lang gisugdan nga 4th Congressman PJ Cup basketball and volleyball tournament nga motapon karong adlawa sa Alodome sa lungsod sa Aloguinsan.
Ang Barili ug Balamban pulos naghupot og 1-0 nga baraha human kini tagsatagsang mipukan sa ilang mga kaatbang niadtong Dominggo nga gipahigayon didto sa Balamban Sports Complex.
Sa maong adlaw, yanong gipukan sa Barili ang Aloguinsan, 82-63, samtang kulbahinam nga gipatapsingan sa Balamban ang inilog nga Toledo City.
Samtang sa main game, ang paglangkat sa ilang unang daog maoy anaa karon sa alimpatakan sa Aloguinsan ug Asturias sa dihang mag-abot usab ang duha sa alas siete sa gabii nga panag-engkuwentro.
Ang Asturias nasugamak sa ilang unang kapildihan human kini patapsingi sa Pinamungajan, 69-66, sa opening day niadtong Oktubre 5 sa Pinamungajan Sports Complex.
Sa volleyball event, mosuway pagkutlo sa ilang ikaduhang daog ang Balamban batok sa Barili sa alas dos ang takna sa hapon nga pagasundan usab sa panagharong tali sa Aloguinsan ug Asturias sa alas 3:30 sa hapon.
Ang Balamban mirehistro sa ilang unang daog pinaagi sa pagpatapsing sa Toledo, 2-1, samtang ang Barili napukan sa Aloguinsan 2-0.
Sa ilang bahin, ang Asturias napildi sa Pinamungajan sa opening day, 0-2.
Ugmang adlawa, ang PJ Cup adto na usab duwaon sa lungsod sa Asturias. (JBM)