PERYAHAN nga anaa atbang sa Talisay City hall kasamtangang ipasuspenso ni Talisay City mayor Gerald Anthony Gullas, human nga adunay nahitabong pagpamusil niadtong Sabado, Oktubre 5.
Nasuta nga nagpahigayon sab og disco ang maong peryahan ug namaligya sab og ilomning makahubog.
Ang pagpa-disco ug pagpamaligya og liquor wa malakip sa ilang gi-applyan nga permit. “Amo gyud sila gipatawag. I told licensing division head even though they apologize for what happened, they should be sanctioned,” matod pa ni Gullas.
Dugang sa mayor nga buot niyang ipasuspenso sud sa usa o duha ka adlaw.
Magsilbi sab kini nga leksyon o warning ngadto sa ubang establisemento sa dakbayan sa Talisay nga kadtong dili mosunod sa lagda ang makatilaw og silot. Kahinumduman nga patay diha-diha dayon ang usa ka sakop sa Akrho Fraternity nga naila nga si Michael Responso, kinsa gipusil diha sa sulod sa peryahan.
Padayon pa nga gipangita sa kapulisan ang mamumuno ug gisubay ang motibo sa kremin. (FMD)