TINGUHA ni Mayor Edgardo Labella nga paluagan ang Female Dormitory sa New Cebu City Jail tungod kay nagdasok sa kadaghan.
Ang mayor nagkanayon nga aduna ray 90 ra ka priso ang kapasidad sa maong facility apan niabot ngadto sa 2,000.
Gumikan niini, ang mayor mobanhaw sa iyang team nga pangulohan sa City Legal Office aron sa pag-review sa ilang mga kaso ug kadtong mahimong maka-avail sa plea bargaining gumikan sa katuigan sa ilang naserbisyo sulod sa City Jail mahimong makagawas pinaagi sa pag-angkon sa salaod.
“Ako silang giingnan nga tagai ko sa listahan unsa pay inyong gikinahanglan kay ang Cebu City andam motabang,” dason ni Labella.
Si Labella nipahibawo nga adunay P8 milyones gikan sa City Hall kansang pundo gikuha sa Philippine Amusement and Gaming Corporation nga magamit sa pagpamalit og higdaanan sa mga priso sanglit kini maoy usa sa ilang mga problema.
Laing P15 milyones nga gikan sa PAGCOR funds ang ilang gastuon alang male dormitory nga adunay kapin 5,000 ka mga inmates.
Giawhag sa mayor ang warden sa duha ka pasilidad nga moduso sa ilang mga wish list aron mahatagan gilayon kini og aksyon sa City Hall.
“Alang kanako, ato gyung ipatunhay kanang gitawag nga penal system nga reformatory, corrective and remedial dili punitive para ang atong mga inmates labi na mga babaye makabalik sa atong main stream society,” matod pa sa opisyal.
Si Labella. maoy pinasidunggan nga mamumolong ato sa unang anibersaryo sa Cebu City Justice Zone diin si Executive Judge sa RTC Macaundas Hadjirasol ang nangulo sa seremonyas. (PAC)