LAPU-LAPU City Mayor Junard Chan ug OIC - City Attorney James Allan Sayson gireklamo og Usurpation of Authority ug Usurpation of Official Functions, violation sa civil service law, omnibus rules of appointment, violation of grave misconduct ug conduct unbecoming of public officer ngadto sa Office of the Ombudsman - Visayas.
Ang maong reklamo gipadangat ni kanhi konsehal sa Lapu-Lapu Leo Mercado nga nag-ugat sa pagtudlo ni Chan ni Atty. Sayson isip City Legal Attorney taliwala sa giingong dili kuwalipikado sa maong katungdanan.
Base sa Local Government Code ang qualification alang sa maong government position gikinahanglan nga residente sa dakbayan ug adunay lima ka tuig nga experience isip legal officer sa probinsiya o dakbayan.
Samtang si Sayson miklaro nga dili siya city legal officer sa dakbayan apan usa lang ka officer in charge kun OIC busa dili mo-apply kaniya ang maong requirements.
Si Mayor Chan sa iyang bahin, wa na matingala pa sa maong reklamo ug iyang gipahibawo nga hangtod karon bakante pa ang puwesto sa City Legal Attorney.
“Dili na ni bag-o, expected na siya (reklamo) aron lang paglawgaw sa atong trabaho (isip mayor),” tipik sa pamahayag sa mayor. (GCM, FVQ)