Sidewalk vendors makadawat og financial assistance gikan sa Dole

MAKADAWAT og livelihood assistance ang gatusan ka sidewalk vendors nga apektado sa clearing operations sa kagamhanan sa dakbayan sa Sugbo.

Kini ang gipahibawo ni Mayor Edgardo Labella human nitabang sa City Government ang Department of Labor and Employment (Dole) ubos usab sa paningkamot ni Secretary Michael Dino sa Office of the Presidential Assistance for the Visayas.

“Through my representation as Mayor of Cebu City, DOLE will provide P10,000 to P20,000 livelihood assistance as additional capital for the vendors that was affected by the clearing operation pursuant to the directive of (Department of Interior and Local Government) DILG.” matod ni Labella.

Atol sa pagsuwat niining balita, si Labella ug ang gatusan ka vendors adunay gipahigayon nga panagtagbo aron hisgotan ang maong ayuda gikan sa Dole ug asang dapita sila makabalik og paninda nga dili makabalda sa mga sakyanan ug pedestrian.

Ang mayor nagkanayon nga mohimo og interview ang personnel sa Dole ug mangayo og rekisito nga nagpamatuod nga sila tinuoray nga vendor ug apektado sa programa.

Si Raquel Arce, pangulo sa Prevention Restoration Order Beautification Enhancement nagkanayon nga adunay kapin o kulang 800 ka mga vendor ang apektado sa road clearing.

Ang labing daghan niinig mao ang naninda sa dalan Colon, Osmeña boulevard, N. Bacalso avenue, Guadalupe, Mabolo ug ubang karsada nga gilimpyohan sa dakbayan.

High rating

Gipahinungod ni Labella ang high rating kon dako nga grado gikan sa DILG nga naangkon sa Cebu City ngadto sa gatusan ka mga vendors kinsa maoy numero uno nga apektado.

“Ang ako gyung pasalamatan mao ang atong mga vendors nga ni-cooperate ug niuban sa atong awhag nga limpyohan. Kahibawo ko nga dakong sakripisyo sa ilang bahin ang pagbalhin sa ilang naandan nga gibaligyaan pero tungod sa atong awhag nipatuo sila,” padayag ni Labella.

Ang mayor nagpasalamat ngadto ni Arce, Market Administrator Jonil Matuguina, City Council nga gipangulohan ni Bise Mayor Michael Rama ug sa tanang nakatampo sa high rating nga naangkon sa siyudad.

Si Arce mapasigarbuhon usab sa iyang buhatan sanglit nagbunga ang ilang paningkamot taliwa sa kakapoy nga ilang giatubang matag adlaw ug nangayo og dispensa ngadto sa mga naapektohan sanglit igo ra silang nagsunod sa sugo sa ilang labaw.

“Dakong dungog sa maong opisina sa Probe nga nagpasalamat ang mayor. Salamat sad mayor sa pagsalig ug rest assured nga magpabilin ang among loyalty sa among trabaho,” matod ni Arce. (PAC)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph