MOABOT diay og 800 ka vendors ang apektado sa clearing operations sa Siyudad sa Sugbo sa kadalanan nga dagko, sama sa Osmeña blvd. ug Colon. Ang paglimpyo nakaapekto sa daghang mga pamilya nga kabus nga nagsalig sa pagpakabuhi sa karsada. Matag vendor, dunay nagsalig nga pamilya. Sa ato pa, dunay 800 ka pamilyang naglisod sa panginabuhi.
Maayo na lang kay dunay hinabang nga P20,000 alang sa rehistradong vendors sa Siyudad sa Sugbo gikan sa Department of Labor and Employment (DOLE).Apan kini di paigo sa nawala nga income sa vendors ug sa panginahanglan sa ilang mga pamilya.
Mas maayo unta kon mapangitaan og paagi sa administrasyon ni Mayor Edgardo Labella ang paghatag og financial assistance sa vendors nga naghatagan og inadlaw nga arkabala sa Siyudad sud na sa daghang katuigan.
Ang hinabang gikan sa Dole di paigo ug hayan, dugay pa usab mapahimudsan tungod sa byukrasya. Kana bayang procedure sa gobyerno kuti kaayo, bisan gani sa pagkuha lang sa gamay nga assistance. Kon magkadugay ang pagpagawas sa hinabang, magkadugay sab ang pag kaon og tinughong sa mga pamilya sa vendors.
Di lang obligasyon sa kagamhanan ang paghawan, nga tuod nakaayo sa kinabag-an, kon di apil na usab ang pagtabang sa mga apektado nga matubag ang ilang panginahanglan bisan tuod kon gamay lang sila nga sektor sa katilingban nga nanginabuhi sa dan sa maayong paagi.
Sama ba ron sa paghangyo sa mga negusyante sa downtown sa pagtigom og pundo nga ikadonar ngadto sa vendors. Kay kon dunay nakabenepisyo niini og maayo, sila na kining mga nagnegusyo sa downtown sa Dakbayan sa Sugbo.
Kay hamugaway nang lakwan ang kadalanan, mas modaghan nang ganahan mamalit sa downtown. Kay di na hagip-ot, mas minos na ang mga krimen, sama sa pagpanguot. Ang panginahanglan sa vendors dinalian, di na makahuwat og ugma pa. Gakutoy na ang ilang tiyan.